Рўзиқул Бердиев: "Навбаҳор" майдонида бир очко ёмон натижа эмас"

Бугунги ўйиннинг савияси ва даражаси юқори ўтди. Мухлисларнинг қўллаб-қувватлаши туфайли ўйин анчагина жанговор ўтди. Ўйин давомида биз рақиблардан кўра кўпроқ имкониятларга эга бўлгандик. Ғалабага ҳам лойиқ эдик. Бироқ бугун "Навбаҳор" посбони Ўткир Юсупов анчагина ишончли ҳаракат қилди ва 3-4та ажойиб сейвлар намойиш қилди. Голдан кейин ҳам ўзимизга ишониб, дуранг учун ҳаракат қилдик ва мақсадимизга эришдик. Захирадан ўйинга қўшилган футболчиларимиз ҳам учрашув якунига қадар ўзларининг ажойиб хатти-ҳаракатлари билан ажралиб туришди. Бироқ ўйиннинг келиб чиқишидан ҳисобга олсак, баҳс дурангга ҳам лойиқ эди. "Навбаҳор" майдонидаги 1 очко ҳам биз учун катта натижа. Умид қиламанки, шундай ажойиб ўйинимизни мавсум якунига қадар сақлаб қола оламиз. Шунингдек, "Навбаҳор" мухлисларига ўз миннатдорчилигимни билдириб қоламан. Ўйин якунида майдонни тарк этаётганимизда улар бизни ажойиб тарзда кузатиб қўйишди. Бу жуда ҳам ёқимли.

Биласиз, биз учун керакли бўлган кўплаб футболчилар жамоани тарк этганди. Ёш футболчилар билан қолгандан кейин клуб раҳбарияти бизга жамоани шакллантириш, уларга катта ўйин амалиёти бериб, уларни сайқаллашни вазифа қилиб берганди. Аммо мавсум бошида кучли ўйин кўрсатиб турганимиздан кейин юқори мақсадларни ҳам кўзлагандик. Яхши ўйин кўрсата бошлагандик. Ҳозирги бир очко эса бизга олдимиздаги мақсадларнинг бир қисмини бажаришга бўлган имкониятни қолдиряпти.