Рўзиқул Бердиев: Бу эътироф биз учун катта рағбат!

Бунга кетма-кет иккинчи марта “Насаф” футбол жамоасининг бош мураббийи Рўзиқул Бердиев ва легионер футболчиси, жамоа сардори Артур Геворкянлар муяссар бўлишди!

Биз бу хушбарни эшитганимизданоқ, дарҳол Рўзиқул Беридевни табриклашга шошилдик.

- Ассалому алайкум Рўзиқул Саъдуллаевич! Сизни ва Артурни яна бир марта энг яхши мураббий ва энг яхши ўйинчи сифатида эътироф этилганингиз билан барча “Насаф” мухлислари номидан муборакбод этамиз!
- Ва алайкум ассалом, катта раҳмат, табрик қўнғироқлари жуда кўп бўлаяпти. Бундай табрикларни эшитишдан жуда хурсандман. Тўғриси, буни кутмаган эдим. Мадомики қилаётган меҳнатимизни ҳурматли журналистларимиз шундай эътироф этибдими, бу мен учун ҳам клубимиз учун ҳам жуда катта рағбат ва келгусида янада яхшироқ ишлашимга ундайди. Бундай эътирофга сазовор бўлишимизга клубимиз раҳбарларининг, ходимларининг ҳамда жамоамиз аъзоларининг катта меҳнати ётибди, қолаверса футбол мухлисларининг ҳам ҳиссалари катта. Буни тан оламан ва раҳмат айтаман.

Фурсатдан фойдаланиб, сайтингиз орқали барча мамлакатимиз ОАВ ходимларига ва журналистларга ўзимнинг чексиз ҳурматимни изҳор этиб, уларга каттадан-катта ташаккуримни билдираман. Умид қиламанки, улар олдида “қарздор” бўлиб қолмаймиз. Янада яхши ишлашга, юртимиз футболининг ривожи учун қўлимиздан келган барча ишни қилишга ҳаракат қиламиз,- дейди Рўзиқул Бердиев.