Мутолаа учун. "Реал" базасидаги машғулотлар, Мендеш билан тушунмовчилик ва Евро-2024да ўйнаш хоҳиши. ЖЧдан сўнг Роналду билан нималар рўй бермоқда?

Португалия терма жамоаси ЖЧ-2022дан чиқиб кетганидан сўнг Криштиану Роналду дунёдаги энг мавқеи баланд совринни қўлга киритишнинг сўнгги имкониятидан маҳрум бўлди. Чиқиб кетиш жуда ҳам оғриқли бўлди, аммо энди ҳис-туйғуларни бироз бас қилиб, сўнгги пайтларда Криштиану атрофидаги содир бўлган ҳамма воқеаларни йиғиш пайти келди.

"Бу яхши фикр эканлигига ишончингиз комилми?" Сантушда Швейцарияга қарши ўйин олдидан Роналду билан оғир суҳбат бўлиб ўтди

Фернанду Сантуш Марокашга қарши ўйиндан бироз аввал, аниқроғи мураббий Криштиануни захирада қолдирган Швейцария билан ўйин (6:1) олдидан Роналду билан кечган қийин диалог ҳақида гапирди.

"У менга ҳеч қачон жамоадан кетмоқчи эканлигини айтмаган. Унинг муносабати қандайлигини кўриш керак. У жамоадошлари билан голларни нишонлади ва мухлисларга миннатдорчилик билдирди.

Менда Криштиану билан Швейцарияга қарши ўйин олдидан суҳбат бўлди. Мен унга 1/8 финал ўйинида асосий таркибда бўлмаслигини айтдим. У суҳбатдан норози эди. Аммо, бу оддий диалог эди ва ҳар томон ўз фикрини билдирди.

Португалия терма жамоаси сардори ўйинни захирадан бошлаганида норози бўлиши одатий ҳол. У мендан "бу яхши фикр эканлигига ишончингиз комилми?" деб сўради. Сизни ишонтириб айтаманки, у ҳеч қачон консентрацияни йўқотмаган".

Сантуш Марокашга қарши ўйинда ҳам Роналдуни захирада қолдирди, аммо унга ўзини кўрсатиш учун бутун бошли иккинчи таймни берди. Криштиану эса оғир ўйинни қутқармади.

Терма жамоада Криштиану билан доим менежери бўлган, шериклари эса буни тушунишмаган

Швейцария билан ўйиндан сўнг ОАВда қизиқ бир инсайд сизиб чиқди. Record'нинг хабарига кўра, Роналдунинг менежери Рикарду Регуфе доим 37 ёшли футболчига ҳамроҳлик қилган, шунингдек фақатгина ўйинчилар кириши мумкин бўлган жойда ҳам юрган. Роналдунинг шериклари нега унинг менежери Португалия терма жамоаси ихтиёрида эканлигини тушунишмаган.

"Регуфе – Криштиануга руҳий далда берадиган инсон. У шунчаки дўст эмас – Рикарду маслаҳат беради, Роналду эса бунинг асосида танлов қабул қилади. Унинг муҳимлиги шунчалик юқорики, Роналду агенти Жорже Мендешдан кўра у билан кўпроқ гаплашади. Криштиану муҳим қарорни қабул қилиши керак бўлган пайт, олдида айнан Рикарду кўпроқ бўлади", – Marca 2018 йилда Регуфени шундай тасвирлаганди.

Криштиану Марокаш билан ўйиндан сўнг Қатарда қолди, шундан сўнг хусусий самолётда учиб кетди

Роналду Португалия ЖЧдан чиқиб кетганидан сўнг жамоа билан Лиссабонга қайтмади – у Қатарда оиласи билан бир неча кун бўлишга қарор қилди.

Криштианудан Португалия терма жамоасининг яна тўққиз футболчиси ўрнак олди: Диогу Далот, Бернарду Силва, Рубен Невеш, Бруну Фернандеш, Рафаэл Леау, Жоау Канселу, Руй Патрисиу, Рафаэл Геррейру ва Матеуш Нунеш. Криштиану фақатгина 12 декабрга келиб оиласи билан шахсий самолётда Қатарни тарк этди.

Роналду терма жамоадан кетмоқчи эмасдек, у кейинги Еврода ўйнамоқчи

Correio da Manhã'нинг хабар беришича, Криштиану миллий жамоадаги иштирокини давом эттиради ва Евро-2024да иштирок этмоқчи.

Роналду айни дамда Португалия терма жамоасида камида 2024 йилнинг ёзигача қадар ҳаракат қилмоқчи.

Криштиану "Реал" базасида шуғулланмоқда ва қайтишни хоҳлайди, аммо Мадрид клуби бунга қарши

Роналду Қатардан тўғри Мадридга йўл олди. Relevo'нинг маълумот беришича, Роналду ҳозирда "Реал" машғулот базасида формасини йиғмоқда. 37 ёшли португалиялик асосий жамоа билан машғулот майдонида эмас, балки комлекснинг бир қисмида ўзининг формасини ушлаб туриш учун жамоадан алоҳида шуғулланмоқда.

Goal инсайд билан бўлишди: Криштиану "Реал"га қайтишга қизиқмоқда ва ҳатто ўзи учун энг минимал маошга ҳам тайёр. Аммо, Мадрид клуби ёши ва унинг позициясида Винисиус ва Карим Бензема ўйнаётгани сабаб Роналдуни олишга тайёр эмас.

As'нинг хабарига кўра, Роналду Флорентино Перес билан гаплашган – "Реал" президенти ўйинчига қанча керак бўлса Вальдебебаседа шуғулланиши мумкинлигини айтган. Перес шунингдек Криштиануга "Реал" базасини ўзининг уйи деб ҳисоблаши мумкинлигини қайд этган.

Роналдуда Мендеш билан кескин муносабатлар бор – бунга сабаб ўйинчи келажагининг ноаниқлиги

Роналду ҳали ҳам клуб изламоқда ва жараён яққол секин бормоқда. As шу сабаб Криштиану ва унинг узоқ йиллик агенти Мендеш ўртасида бироз кескинлик юзага келган.

У 1 январдан бошлаб янги жамоасига қўшилиши мумкин, аммо ҳеч бир клуб билан келишув йўқ. Европа клублари ўйинчининг юқори маош талаби сабаб у билан шартнома имзолашмаяпти ва агент бошқа вариантларни изламоқда.

Бундай вазиятлар Роналду ва Мендеш ўртасида бир неча бор юзага келган. Агент ва ўйинчи бир-бирига ота ва ўғил каби муносабатда, шу сабаб улар муаммоларни ҳал этишган.

Роналдунинг трансфери бўйича ягона таклифни Саудия Арабистонининг "Ал Наср" клуби берган. Хабарларга кўра, ўтиш амалга ошса, ўйинчининг даромади йилига 200 миллион еврони ташкил этади.

Криштианунинг келажагида муҳим ролни ПСЖ собиқ спорт директори Антеру Энрике ўйнаши мумкин. У ҳозирда чемпионат раҳбари лавозимини эгаллаб турибди ва Роналдунинг мамлакат клубларидан бирига ўтишида ўз ҳиссасини қўшиши мумкин.

Ёки португалиялик барибир Европада қолишга ҳаракат қиладими?

Алишер Остонов таржимаси