Расман: “Бухоро” Гесс билан бир йиллик шартнома тузди

Мавсумни Тачмурод Агамуродов бошчилигида ўтказган бухороликлар якунда 7-ўрин билан кифояланди. Бу - раҳбариятни қониқтирмаган кўринади. Шунинг учун ҳам туркманистонлик мураббий билан ҳамкорлик тўхтатилди.

“Бухоро” ФК бош мураббийликка Эдгар Гессни олиб келишга қарор қилди. Бунгача “Андижон”, “Насаф”, “Шўртан” каби жамоаларни бошқарган Эдгар Яковлевич ҳозирда Бухорода бўлиб турибди. Тасдиқланган хабарга кўра, мураббий янги жамоаси билан бир йиллик битимга имзо чеккан.

Айтиш керакки, жамоани биргина Агамуродов тарк этмаган. Бунгача бош мураббийга яқиндан ёрдам бериб келган Жамшид Саидов, Сергей Захарецкий, Камо Газаров сингари мураббийларга ҳам очиқ эшиклар кўрсатилган.

Фақатгина жисмоний тайёргарлик бўйича мураббий сифатида ишлаб келаётган Евгений Антоненко жамоада фаолиятини давом эттирадиган бўлди.

Чемпионат якунига етгач, футболчиларга таътил эълон қилинган. Катта эхтимол билан янги мураббий футболчиларни 5 декабрга йиғишни режалаштирган.

Шунингдек мураббийлар штабига ҳам янгилар жалб этилади.