Қозоғистон чемпионатини “ёндирган” Шаҳбоз Умаров — чемпионлик учун кураш, Қозоғистон чемпионатидаги рақобат, кейинги клуби ва нима сабабдан терма жамоага чақирилмаётганининг сабабини айтди

— Чемпионлик ўйинига қандай тайёргарлик кўрдингизлар? — Бугун тарихий учрашув эди. Қозоғистон чемпионатидаги ҳар учрашув жуда қийин кечади. Барча жамоалар курашувчан. Аммо биз бугун ғалаба учун жонимизни беришга ҳам тайёр эдик. Футболчилар билан кийиниш хонасида бугун ғалаба қозонишга мажбур эканлигимизни муҳокама қилган эдик ва якунда ғалаба қозониб, чемпион бўлдик.

  Қозоғистон чемпионатининг даражаси ҳақида гапириб ўтсангиз. Бу ерда рақобат қай даражада?

 — Тўғриси менда кўп жароҳатлар бўлди. Қозоғистондаги биринчи ярим йилни жароҳатим сабаб ўтказиб юборишга мажбур бўлдим. Ҳозир ҳаммаси яхши. Миллий чемпионат даражасини юқори баҳолайман. Сабаби биз мавсум давомида бирорта осон учрашув ўтказмадик. 

 Мавсум якунида клуб билан шартномангиз тугайди. Режаларингиз қандай? Кейинги мавсум сизни бошқа клуб ва янги чемпионат сафида кўришимиз мумкинми? 

— Мавсум ҳали якунлангани йўқ. Бизни чемпионатда ва кубок финалида ўйинимиз бор. Ҳозир эмоцияда келажагим ҳақида бирор нарса дейиш қўйишим нотўғри бўлади. Бугун чемпионликни нишонлаяпмиз. Мавсумни тугатиб олайлик, кейин эса яхшилаб ўйлаб кўриб бир қарорга келаман.

Терма жамоадан чақирув олмаётганингизга муносабатингиз қандай? Терма жамоага чақирилмаётганингизнинг сабаби нима деб ўйлайсиз?

 — Мени терма жамоага чақиришди, аммо турли хил сабабларга кўра терма жамоа йиғинларида иштирок эта олмаяпман. АҚШда бўлиб ўтган йиғин ва ўртоқлик учрашувларига чақирув олгандим, бироқ виза билан муаммога дуч келдим ва шу сабабдан йиғинда иштирок эта олмадим. Октябрь ойидаги ФИФА кунларида эса жароҳат(мушаклар жароҳати) сабаб терма жамоамизга ёрдам бера олмадим. 

“Ордабаси” жамоасида мавсум якунланганидан сўнг, агар сизни терма жамоа йиғинларига чақирилишингиз мумкин ва шундай ҳам бўлса таътил муддатингиз кескин қисқариб кетади. Бунга фикрингиз қандай? Осиё кубогига бориш имкониятларингизни қандай баҳолайсиз? 

— Ўзбекистон барчамизнинг ватанимиз ва юртимиз шаънини ҳимоя қилиш барчамизнинг бурчимиз. Мен терма жамоага боримни беришга тайёрман. Терма жамоа сафидаги катта мусобақаларда иложи борича яхшироқ натижа қайд этишимиз керак.