Қосимовнинг жарима зарбалари, Аҳмедовнинг суперголи ва "Бунёдкор"даги 5:1. Ўзбекистон ва Қатар терма жамоаларининг ўзаро ўйинлар тарихи

 Биз эса миллий терма жамоамизнинг Қатарга қарши кечган ўзаро ўйинлар тарихига назар соламиз.

Терма жамоамиз ўз тарихида биринчи маротаба Қатар билан 2000 йилда Ливанда ўтказилган Осиё Кубогида тўқнаш келган. Ливандаги мусобақа терма жамоамизнинг қитъа биринчиликларидаги энг муваффақиятсиз иштироки билан эсда қолган. Вакилларимиз мусобақадаги дастлабки баҳсни айнан Қатарга қарши ўтказишган. Учрашув 1:1 ҳисоби билан якунланган. Миржалол Қосимов 73-дақиқада жарима зарбасидан ҳисобни тенлаштирган. Кейинги икки учрашувда терма жамоамиз ўз дарвозасидан нақд 13та гол ўтказиб юборган. Дастлаб, Японияга 1:8, сўнгги турда эса Саудияга 0:5 ҳисобида мағлуб бўлганмиз.

14.10.2000. Осиё чемпионати-2000. Ливан.

Ўзбекистон - Қатар 1:1

Голлар: Муҳаммад Ал-Блуши - Миржалол Қосимов

Ўзбекистон: Павел Бугало, Баҳтиёр Ашурматов, Андрей Фёдоров, Миржалол Қосимов, Отабек Шомуродов(Ниғматулла Қуттибоев), Николай Ширшов, Максим Шацких, Даврон Файзиев, Сергей Лебедев, Рустам Дўрмонов(Андрей Акопянц), Шуҳрат Раҳмонқулов(Игорь Шквирин).

Орадан бир йил ўтар-ўтмас терма жамоамиз яна Қатар билан тўқнаш келади, бу сафар Осиёда ўтказиладиган илк мундиалнинг саралашида. "Пахтакор" стадионида ўтказилган учрашувда Жафар Ирисметов ҳисобни очади. Иккинчи бўлимнинг дастлабки дақиқаларида Миржалол Қосимов ҳисобни йириклаштиради. Яна Қосимов, яна жарима зарбаси ва яна Қатар дарвозасига. Жассим Ал-Тами 88-дақиқада ҳисобни қисқартиради. Якуний ҳисоб 2:1.

26.08.2001. ЖЧ-2002 2-саралаш босқичи. "Пахтакор" стадиони.

Ўзбекистон - Қатар 2:1

Голлар: Жафар Ирисметов, Миржалол Қосимов - Жассим Ал-Тами.

Ўзбекистон: Алексей Поляков, Асрор Алиқулов, Миржалол Қосимов, Сергей Лушчан, Андрей Власичев(Марат Ахмеров), Баҳодир Аннаматов(Анвар Солиев), Даврон Файзиев, Февзи Давлетов, Ширшов Николай, Максим Шацких, Жафар Ирисметов(Леонид Кошелев).

Сафарда баҳсда эса терма жамоамиз 2:2 ҳисобидаги жанговар дуранг қайд этади. Футболимиз афсонаси Қосимов эса яна бир бор қатарликларни ранжитади.

28.09.2001. ЖЧ-2002 саралаш босқичи. "Ал Араби" стадиони.

Қатар - Ўзбекистон 2:2

Голлар: Муҳаммад Ал Энази, Халифа Аҳмад - Миржалол Қосимов, Николай Ширшов.

Ўзбекистон: Алексей Поляков, Сергей Лушчан, Асрор Алиқулов, Даврон Файзиев, Александр Хвостунов, Андрей Власичев, Февзи Давлетов (Бахтиёр Ҳамидуллаев 46), Николай Ширшов, Миржалол Қосимов (Андрей Акопянц, 74), Улуғбек Бақоев (Абдуқаҳҳор Маъруфалиев, 30), Жаъфар Ирисметов.

2006 йили Осиё Кубоги-2007 саралашида яна Қатар билан баҳслашамиз. Баҳор фаслининг илк кунида ўтказилган учрашувда терма жамоамиз ўз тарихида биринчи маротаба Қатарга мағлуб бўлади. Якуний ҳисоб 1:2. Қизиғи шундаки, ўйиндаги барча голларга қатарлик футболчилар муаллифлик қилишади.

01.03.2006. Осиё Кубоги-2007 саралаш босқичи. "Ал Садд" стадиони.

Қатар - Ўзбекистон 2:1

Голлар: Одил Лами, Али Солиҳ Нассер - Муҳаммад Ражаб (автогол).

Ўзбекистон: Евгений Сафонов, Андрей Федоров, Асрор Алиқулов, Леонид Кошелев (Ринат Байрамов, 77), Виктор Карпенко (Анвар Солиев, 50), Владислав Кирьян, Александр Гейнрих (Зафар Холмуродов, 62), Алексей Николаев, Тимур Кападзе, Ислом Иномов, Максим Шацких.

Тошкентдаги жавоб учрашувида терма жамоамиз 2:0 ҳисобида ишончли ғалабани қайд этган. Терма жамоамизнинг голларига Леонид Кошелев ва Илёс Зейтуллаевлар муаллифлик қилган.

15.11.2006. Осиё Кубоги-2007 саралаши. "Пахтакор" стадиони.

Ўзбекистон - Қатар 2:0

Голлар: Леонид Кошелев, Илёс Зейтуллаев.

Ўзбекистон: Игнатий Нестеров, Андрей Фёдоров, Виталий Денисов, Алексей Николаев, Асрор Алиқулов, Владислав Кирьян, Тимур Кападзе(Улуғбек Бакаев), Леонид Кошелев(Александр Гейнрих), Илёс Зейтуллаев(Виктор Карпенко), Сервер Жепаров, Максим Шацких.

2010 йилги мундиал саралашининг 3-босқичининг илк учрашувини Доҳада Қатарга қарши ўйин билан бошлаган. Лекин вакилларимиз стартни муваффақиятсиз бошлаган ва Қатардан 0:3 ҳисобида мағлубиятни қабул қилиб олган. Саралаш якунида терма жамоамиз бор-йўғи 4 очко билан гуруҳда сўнгги ўринни эгаллаганди.

06.09.2008. ЖЧ-2010 саралаш босқичи. "Жассим Бин Ҳамад" стадиони.

Қатар - Ўзбекистон 3:0

Голлар: Сиддиқ Мажди, Муҳаммад Ҳасан, Талал Ал Блуши.

Ўзбекистон: Игнатий Нестеров, Илҳом Суюнов, Бахтиёр Ашурматов, Асрор Алиқулов, Ислом Иномов, Азиз Ҳайдаров (Александр Гейнрих, 46), Виталий Денисов, Одил Аҳмедов, Тимур Кападзе (Вагиз Галиулин, 66), Сервер Жепаров, Максим Шацких (Улуғбек Бақоев, 79).

Тошкентда ўтказилган жавоб ўйинида эса терма жамоамиз 3-саралаш босқичидаги ягона ғалабасини қўлга киритган. Қатар "Пахтакор" стадионида йирик 4:0 ҳисобида тор-мор этилганди. Ўйин Фарҳод Тожиевнинг бенефисига айланган.

28.03.2009. ЖЧ-2010 3-саралаш босқичи. "Пахтакор" стадиони.

Ўзбекистон - Қатар 4:0

Голлар: Фарҳод Тожиев(хет-трик), Анвар Солиев.

Ўзбекистон: Игнатий Нестеров, Анвар Ғофуров, Ҳайрулла Каримов, Ислом Тўхтажўхаев, Саҳоб Жўраев, Виктор Карпенко(Станислав Андреев), Одил Аҳмедов, Жасур Ҳасанов, Сервер Жепаров(Тимур Кападзе), Максим Шацких(Анвар Солиев), Фарҳод Тожиев.

11 йиллик танаффусдан сўнг икки мамлакат терма жамоалари яна бир маротаба Осиё Кубогининг гуруҳ босқичида майдонга чиқишади. 2011 йилги Осиё Кубоги Қатар майдонларида ўтказилганидан хабарингиз бор. Мусобақанинг очилиш ўйинидаёқ МТЖ мезбонларга қарши тўқнаш келади. Буёғи эса тарих, уни ўзингиз ҳам эслайсиз. Аҳмедовнинг "супер" голи ва 2:0 ҳисобидаги ғалаба.

07.01.2011. Осиё Кубоги гуруҳ босқичи. "Ҳалифа Интернэйшнл" стадиони 

Қатар - Ўзбекистон 0:2

Голлар: Одил Аҳмедов, Сервер Жепаров.

Ўзбекистон: Игнатий Нестеров, Саҳоб Жўраев (Станислав Андреев, 54), Виктор Карпенко, Анзур Исмоилов, Одил Аҳмедов, Жасур Ҳасанов (Санжар Турсунов, 66), Тимур Кападзе, Азиз Ҳайдаров, Сервер Жепаров, Максим Шацких, Александр Гейнрих (Олим Навкаров, 89).

2012 йилнинг кузида Қосимов бошчилигидаги терма жамоамиз Бразилия майдонларида бўлиб ўтадиган мундиал йўлланмаси учун курашаётган эди. Биз яна Қатар билан бир гуруҳдан жой олгандик. Доҳадаги сафар баҳсида терма жамоамиз 1:0 ҳисобида ғалабани тантана қилади. Қийин кечган учрашувда Санжар Турсуновнинг голи бизга уч очкони тақдим этган.

16.10.2012. ЖЧ-2014 4-саралаш босқичи. "Ал Садд" стадиони.

Қатар - Ўзбекистон 0:1

Гол: Санжар Турсунов.

Ўзбекистон: Игнатий Нестеров, Акмал Шораҳмедов, Ислом Тўхтахўжаев, Анзур Исмоилов, Шоҳруҳ Гадоев (Виталий Денисов, 75), Жасур Ҳасанов, Санжар Турсунов (Олег Зотеев, 90), Тимур Кападзе, Азиз Ҳайдаров, Сервер Жепаров, Улуғбек Бақоев (Александр Гейнрих, 87).

Тошкентдаги баҳсда эса бизга фақатгина 6 тўп фарқли ғалаба керак бўлган ёки Жанубий Корея ўз уйида Эронни мағлуб этиши керак эди. Танаффусга терма жамоамиз 0:1 ҳисобида йўл олган. Иккинчи бўлимда эса қатарликлар дарвозасига 5та тўп киритганмиз, аммо бу етарли эмас эди. Фақатгина 7:1 ҳисобидаги ғалаба бизга Бразилия "чипта"сини тақдим этиши мумкин эди. Сеулда баҳснинг иккинчи бўлимида Эрон гол уради ва кореяликларни 1:0 ҳисобида мағлубиятга учратади. Биз гуруҳда учинчи ўринни эгаллаймиз ва плей-офф баҳсларида Иорданияга пенальтилар сериясида мағлуб бўламиз.

18.06.2013. ЖЧ-2014 4-саралаш босқичи. "Бунёдкор" стадиони.

Ўзбекистон - Қатар 5:1

Голлар: Илёс Абдулқодир - Баҳодир Насимов(дубль), Олег Зотеев, Одил Аҳмедов, Улуғбек Бакаев.

Ўзбекистон: Игнатий Нестеров, Анзур Исмаилов, Виталий Денисов, Акмал Шораҳмедов, Одил Аҳмедов, Жасур Ҳасанов(Олег Зотеев), Санжар Турсунов, Сервер Жепаров, Тимур Кападзе, Фарҳод Тожиев(Улуғбек Бакаев), Александр Гейнрих(Баҳодир Насимов).

Австралиядаги Осиё Кубогига тайёргарлик жараёнида терма жамоамиз Қатарга қарши ўртоқлик ўйинида иштирок этади. Миржалол Қосимов шогирдлари сафарда йирик 0:3 ҳисобида мағлубият учрашади, аммо бу учрашувнинг ҳеч қандай расмий аҳамиятга эга эмас эди.

06.10.2014. Ўртоқлик учрашуви. "Ал Араби" стадиони.

Қатар - Ўзбекистон 3:0

Голлар: Себастиян Куинтана, Ҳассан Ал Ҳайдос, Мешал Мубарак.

Ўзбекистон: Игнатий Нестеров, Егор Кримец (Шавкат Муллажонов, 83), Бобур Йўлдошев (Ислом Тўхтахўжаев, 76), Владимир Козак, Воҳид Шодиев (Наврўз Алимов, 70), Сардор Рашидов (Фаррух Сайфиев, 70), Жавлон Иброҳимов (Фозил Мусаев, 67), Жамшид Искандеров, Салим Мустафоев, Шуҳрат Муҳаммадиев (Акмал Шораҳмедов, 46), Игорь Сергеев.

2016 йилнинг сентябрь ойида Самвел Бабаян бошчилигидаги терма жамоамиз ЖЧ-2018 3-саралаш босқчини бошлаган эди. 1 сентябрь куни Александр Гейнрихнинг голи эвазига Сурия мағлуб этган бўлсак, кейинги учрашув сафарда Қатарга қарши эди. Курашларга бой кечган учрашувнинг 87-дақиқасида Егор Кримец стандарт вазиятдан узатилган тўпни боши билан рақиб дарвозасига жойлаб қўйади ва 1:0 ҳисобидаги ғалаба. Кримец ўз голини Ўзбекистон Республикасининг биринчи президенти Ислом Каримов хотирасига бағишлайди.

06.09.2016. ЖЧ-2018 саралаш босқичи. "Жассим Бин Ҳамад" стадиони.

Қатар - Ўзбекистон 0:1

Гол: Егор Кримец.

Ўзбекистон: Александр Лобанов, Анзур Исмоилов, Виталий Денисов, Егор Кримец, Ислом Тўхтахўжаев, Сервер Жепаров (Жавоҳир Соҳибов, 82), Одил Аҳмедов, Отабек Шукуров, Сардор Рашидов (Александр Гейнрих, 59), Игорь Сергеев, Элдор Шомуродов.

Жавоб учрашуви ҳам терма жамоамиз учун осон кечмайди. Қатар анча тартибли ҳимояланади. Учрашувнинг 65-дақиқасида Одил Аҳмедов жарима зарбасидан унумли фойдаланади ва терма жамоамиз учун қимматли бўлган уч очкони тақдим этади.

28.03.2017. ЖЧ-2018 3-саралаш босқичи. "Бунёдкор" стадиони.

Ўзбекистон - Қатар 1:0

Гол: Одил Аҳмедов.

Ўзбекистон: Александр Лобанов, Анзур Исмаилов, Егор Кримец, Даврон Ҳошимов, Азиз Ҳайдаров, Сервер Жепаров,(Вадим Афонин), Одил Аҳмедов, Александр Мерзляков, Сардор Рашидов(Марат Бикмаев), Игорь Сергеев(Темурхўжа Абдуҳолиқов), Элдор Шомуродов.

Эктор Купер бошчилигидаги терма жамоамиз 2018 йилнинг кузида навбатдаги Осиё Кубогига тайёргарлик кўриш мақсадида Қатар жамоасини Тошкентга ўртоқлик ўйинига таклиф этганди.  "Бунёкдор" стадионида ўтказилган баҳсда Одил Аҳмедов ва Марат Бикмаевларнинг голлари эвазига терма жамоамиз 2:0 ҳисобидаги ғалабани расмийлаштирган эди. Қизиғи шундаки, икки ойдан сўнг Тошкентда мағлуб бўлган Қатар ўз тарихида биринчи маротаба Осиё Кубогини қўлга киритади. Биз эса 1/8 финалда Австралияга пенальтилар сериясида имкониятни бой бериб, уйга қайтамиз.

16.10.2018. Ўртоқлик учрашуви. "Бунёдкор" стадиони.

Ўзбекистон - Қатар 2:0

Голлар: Одил Аҳмедов, Марат Бикмаев.

Ўзбекистон: Ўткир Юсупов, Акмал Шораҳмедов, Егор Кримец(Достон Турсунов), Анзур Исмаилов, Олег Зотеев, Одилжон Ҳамробеков, Одил Аҳмедов(Ислом Тўхтахўжаев), Ҳусниддин Ғофуров(Достонбек Ҳамдамов), Жавоҳир Сидиқов, Икром Алибоев(Владимир Козак), Элдор Шомуродов(Марат Бикмаев).

Февралда бўлиб ўтган ушбу баҳс ҳали барчанинг ёдида эканлиги аниқ. Терма жамоамиз Осиё Кубогининг чорак финал баҳсида мезбон Қатар билан тўқнаш келди. Афсуски, терма жамоамиз бу сафар ҳам пенальтилар сериясида имкониятни бой берди ва мусобақани эрта тарк этди. Бугун февралдаги баҳс учун қасос олиш вақти келди йигитлар. Олға, Ўзбекистон.

03.02.2024. Осиё Кубоги-2023 1/4 финал. "Ал Байт" стадиони.

Қатар - Ўзбекистон 1:1 (пенальтилар серияси 3:2)

Голлар: Ўткир Юсупов (автогол) - Одил Ҳамробеков. 

Ўзбекистон: Ўткир Юсупов, Фаррух Сайфиев (Зафармурод Абдираҳматов, 99), Рустам Ашурматов, Отабек Шукуров, Одил Ҳамробеков, Жалолиддин Машарипов, Остон Ўрунов (Шаҳбоз Умаров, 74), Умар Эшмуродов, Азизбек Турғунбоев (Муҳаммадқодир Ҳамралиев, 106), Аббосбек Файзуллаев (Ҳожимат Эркинов, 114), Абдулла Абдуллаев.