"Қизилқум": Йиғинда грузиялик легионерлар қатнашмоқда

Машғулотларда биринчи давра учрашувларини ёшлар таркибида ўтказган ярим ҳимоячи Бобиржон Искандаров, ҳужумчи Баҳодир Қосимовлар ҳам қатнашмоқда. Жамоа мураббийлар штаби иккинчи даврага муносиб тайёргарлик кўриш мақсадида яна бир қатор легионерларни ҳам кўрикдан ўтказишни режалаштиришган. Жумладан, пойтахтда уюштирилаётган машғулотларга грузиялик Георгий Квесишивили, Георгий Микаберидзе жалб этилган. Ҳимоячи Квесишивили “Бухоро” жамоасидаги ўйинлари билан мухлисларимизга яхши таниш. Ярим ҳимоя ва ҳужум чизиғида тўп сурадиган Микаберидзе эса охирги мавсумда Грузиянинг “Олимпи” (Рустави) жамоаси шарафини ҳимоя қилган.
   
Кончилар Тошкентда 20 июлга қадар йиғин ўтказишни мўлжаллашган. Бу вақт мобайнида Юрий Лукин шогирдлари бир неча ўртоқлик ўйинларида майдонга тушади.
   
“Қизилқум” жамоаси дастлабки синов учрашувини 14 июлда Наманганнинг “Навбаҳор” вакилларига қарши ўтказди. Унда мураббийлар штаби икки таркибни майдонга чиқазди.
   
Дастлабки бўлимда навоийликлар майдонда қуйидаги таркибда майдонда ҳаракат қилдилар:
   
Артём Макосин, Акмал Рустамов, Асқаржон Муҳиддинов, Георгий Квесишивили, Миржалол Қурбонов, Азизбек Усмонов, Алишер Саноев, Самандар Шодмонов, Шерали Жўраев, Руслан Вагапов, Георгий Микаберидзе.
   
Иккинчи бўлимда эса қуйидаги футболчилар “Қизилқум” либосида учрашувни давом эттирдилар:
   
Дилшод Ҳамроев, Акмал Холиқов, Файзулло Қамбаров, Ғайрат Жумаев, Бобиржон Искандаров, Элдор Бойматов, Жамшид Шоҳназаров, Сарваржон Холматов, Наврўзбек Алимов, Алишер Холиқов, Нодирбек Шаҳобиддинов (Баҳодир Қосимов).
   
Учрашув тафсилотига қисқача тўхталадиган бўлсак, ўйин тенг курашлар остида ўтди. Ҳар иккала жамоада ҳам голга тортадиган вазиятлар етарлича содир этилган бўлса-да, ундан фақат бир бор наманганликлар унумли фойдаландилар. Ўйиннинг 60-дақиқасида кончилар ҳимоячиларининг ўзаро тушунмовчилигидан самарали фойдаланган Алишер Маҳмудов дарвозабон Дилшод Ҳамроевни осонликча доғда қолдирди. Учрашув охиригача шу ҳисоб ўзгармай қолди.
   
Режага кўра, “Қизилқум” жамоаси навбатдаги ўртоқлик учрашувини 17 июль куни ўтказади. Шу куни Юрий Лукин шогирдлари “Бунёдкор” ёшлари билан куч синашади.