ПСЖ посбони алимент бўйича 66 млн.лик қарзини тўлади

Sport Baza маълумотларига кўра, 28 май куни ПСЖ ва Россия терма жамоаси дарвозабони 66 046 160 рубль миқдоридаги қарзни тўлиқ тўлади.

Барча қарзлар тўланганига қарамасдан, футболчига нисбатан қўлланилган чоралари ҳалигача олиб ташланмаган. Агар суд ижрочилари бу чораларни олиб ташласа, Сафонов 6 июнь куни Нигерияга қарши ўртоқлик ўйинида иштирок этиши мумкин.

2024 йил январда Москванинг Никулинский суди ПСЖ дарвозабонини қизи таъминоти учун даромадларининг тўртдан бир қисмини ўтказиб беришга мажбур қилди. Августда Мосгорсуд бу қарорни тасдиқлаб, "Краснодар"нинг собиқ ўйинчиси шикоятини рад этди.

Апрелда футболчининг собиқ турмуш ўртоғи Анастасия Федерал суд ижрочилари хизматига ариза ёзиб, уни алимент тўламаслиги учун жиноий жавобгарликка тортишни сўраган эди.