Превью. Barca - Juve, Месси & Дибала/Буффон ва бошқа ўйинлар ҳақида
12 сен 2017 18:50
Новости

Превью. Barca - Juve, Месси & Дибала/Буффон ва бошқа ўйинлар ҳақида

Барча орзиқиб кутган Европа чемпионлар лигасининг янги 2017/2018 йилги мавсумига старт берилади.

Сешанба куни, яъни бугун тўртта гуруҳда 1-тур ўйинлари бўлиб ўтади.

Эртага эса қолган тўртта гуруҳда ўйинлар ўтказилади.

Биз аввало "A" гуруҳига тўхталиб ўтамиз.

Ушбу гуруҳда фаворит жамоа аниқ. Буни гуруҳдаги қолган учта жамоа вакиллари ҳам тўғри тушуниб туришибди. Аммо факт шуки, "Манчестер Юнайтед" қоғозда фаворит. Майдонда эса ушбу фаворит номини амалда исботлашга тўғри келади. "Манчестер Юнайтед" мухлислари учун яна бир ёқимсиз факт шундан иборатки, МЮ "Базель", "Бенфика" ва ЦСКА жамоалари билан бир "квартет"дан ўрин олган йиллари гуруҳдан чиқолмаган.
Жозе Моуринью ушбу нохуш анъанага чек қўймоқчи.
"Базель", "Бенфика" ҳамда ЦСКА жамоалари эса асосан иккинчи ўрин учун кураш олиб боришлари тахмин қилинмоқда.
Илк турда МЮнинг меҳмонига айланадиган Рафаэль Вики жамоасининг ички чемпионатдаги кўнгилдагидек эмас. Жамоа Швейцария чемпионатида 3-ўринда кетмоқда. "Базель"нинг энг оғриқли ва муаммоли нуқтаси бу ҳимоя. Жамоа чемпионатда ўтказилган 7 ўйинда 9та гол қўйворган. Бу эса "Базел"дек жамоа учун ички чемпионатда албатта уятли кўрсаткич. Шу боисдан жамоа турнир жадвалида пешқадам эмас.
"Манчестер Юнайтед" эса янги мавсумни кўтаринки кайфият билан бошлади. Фақатгина ўтган ҳафтада Жозе Моуринью шогирдлари "Сток Сити" билан бўлган ўйинда мавсумдаги илк очколарини йўқотишди.
Бу эса жамоанинг ғалабали одимларини тўхтатиб қолди.
МЮ маълум танаффусдан сўнг ЕЧЛга қайтди. Илк ўйин эса ўз уйида. Бу эса жамоага нисбатан бироз босим юклаши аниқ. "Базель" айнан шу нарсадан фойдаланиб қолиши мумкин.
Моуринью эса рақибининг ҳимоядаги муаммоларидан бохабар ва Погба-Мхитарян-Лукаку учлиги орқали айнан ўша бўшлиқларни қидириши тайин.

Гуруҳдаги иккинчи ўйинда "Бенфика" Португалияда ЦСКАни меҳмон қилади. Руи Виториа бошчилигидаги "Бенфика" анча тартибли ўйнайди. "Бенфика" Португалия чемпионатини яхши бошлади. Жамоа ҳозирчага ўтказилган 5 учрашувдан фақатгина биттасида дуранг қайд этди. Қолган барча ўйинлар ғалаба билан тугаган. ЦСКАда эса вазият бошқача. Жамоа Гончаренко қўл остида ҳали ўз ўйинини топганича йўқ. ЦСКА Россия премьер лигасида ҳам кўнгилдагидек иштирок эта олмаяпти. Ҳимоядаги камчиликлар ва Акинфеевнинг жароҳати ЦСКА бир мувозанатда туришига тўсқинлик қилмоқда.
Бу ўйинда "ҳарбийлар" Португалиядан бир очко билан қайтишса ҳам катта гап. Бу тўқнашувда фаворит аниқ. ЦСКА эса рақибининг ўйинидан келиб чиқиб ўйнашга мажбур.

"B" гуруҳига назар ташлайдиган бўлсак, бу "квартет"да икки яққол ажралиб турган жамоаларни кўрамиз. Шубҳасиз ушбу гуруҳда "Бавария" ва ПСЖ гуруҳдан чиқиш учун асосий даъвогар. "Андерлехт" ва "Селтик" эса Европа лигасига йўлланма берувчи ўрин учун курашиши айтилмоқда. ПСЖ ва "Бавария" фонида бу албатта табиий ҳолат. Лекин "Андерлехт" ҳамда "Селтик" ҳам шунчаки ПСЖ ва "Бавария"нинг 1-2 ўринни олишларини томоша қилиб ўтирмаслиги аниқ. Рене Вайлер ва Брендан Рожерс ушбу гуруҳда сенсация қайд этиш учун тиш-тирноқлари билан ҳаракат қилишади. Шуни ҳам унутмаслик керакки, Бельгияда ҳар қандай рақибга осон бўлмаслиги аниқ. Ёки Шотландияда "Селтик Парк"даги "дузах"нинг "қайноқ" қабули исталган рақибни довдиратиб қўяди.
Уйдаги ўйин фактори эвазига ушбу икки жамоа ПСЖ ва "Бавария" қаршилик кўрсатишга уриниб кўриши мумкин. Акс ҳолда маҳорат бобидаги даража ва тафовут барибир ўз сўзини айтиши аниқ.

"Бавария" бугун Мюнхенда "Андерлехт" билан куч синашади. Бундеслиганинг ўтган турида мағлубиятга учраган мюнхенликларнинг жаҳли чиққан. Анчелотти айнан ЕЧЛнинг илк турига қадар футболчиларни толиқтириб қўймаслик мақсадида асосий футболчиларига "Андерлехт" билан ўйин олдидан дам берганди. Бу эса якунда "Бавария"га қимматга тушди. Энди ўша ўйиндаги муваффақиятсизлик учун ҳам "Бавария" бу баҳсга икки ҳисса куч билан ўйнашга мажбур.
Анчелотти эса яна ўша ўзининг аввалги тактик схемаси, 4-2-3-1га қайтиши аниқ. Чунки "Хоффенхайм"га қарши ўйиндаги тактика иш бермаганини таъкидлаган мураббий бу хатони иккинчи бор такрорламаса керак.
Рене Вайлер бошчилигидаги "Андерлехт"нинг ҳозирги ҳолати ҳавас қиладиган даражада эмас. Жамоа ички чемпионатда ҳам кўнгилдагидек иштирок эта олмаяпти. Олтита ўйинда жами 6 очко жамғарган "Андерлехт"нинг Германияда "Бавария"га етарлича қаршилик кўрсатиши мўъжизага тенг.
Бу ўйинда меҳмонлар ўз дарвозаларидан кўп тўп ўтказиб юбормаслик учун ҳаракат қилишса керак. Чунки якунда "Селтик" билан бўладиган рақобатда тўплар нисбати ҳам муҳим аҳамиятга эга бўлиб қолиш эҳтимоли йўқ эмас. Бу ўйинда фаворит жамоа кимлигини айтиб ўтишга ҳожат йўқ.

Шотландияда эса Неймар ва Мбаппе билан бойиган ПСЖни "Селтик Парк"даги "қайноқ" муҳит кутмоқда. Брандан Рожерснинг ушбу тўқнашувдаги асосий қуроли ва "Селтик Парк"даги муҳит бўлади. Қўшимчасига жамоа яхши ўйнай олса ва мураббий кўрсатмаларини тўлиқ бажарса, балки ЕЧЛнинг дастлабки сенсациясига сабаб бўлиши мумкин.
Эмери эса юлдузлар билан ишлашда кўп тажриба эга эмас. Францияда ҳар қандай рақибни "ғажиб" қўяётган ПСЖ учун ЕЧЛ ўзгача олам.
Франция дивизионидаги ҳоким ЕЧЛда, камига "Бавария" бор ҳудудда ўзини хўжайиндек тута олмайди. Камида ҳозирча ушбу статусга эга муносиб эканлигини амалда исботлагани йўқ. ПСЖнинг жорий мавсумдаги асосий мақсади ва вазифаси айнан шу нарсани амалда исботлашдан иборат бўлади.
Дастлабки имтиҳон эса Шотландияда бўлади.

"C" гуруҳида биргина Озарбойжоннинг "Қорабоғ" жамоасини ҳисобга олмаганда, қолган учта клуб деярли тенг кучли жамоалар. Тўғри, "Челси" ва "Атлетико" "Рома"га нисбатан даража бўйича ҳам юқорироқ туришади. Аммо "Рома" клуби ҳам кўпни кўрган ва элит жамоаларга доим рақобатчилар қаторида бўлган рақиб. Яъни "Рома" гранд жамоаларга қарши қандай ўйнашни билади ва бу каби рақобатларда пишган.
Конте эса "Челси"ни бир йиллик танаффусдан кейин ЕЧЛга қайтарди. Антонио Конте бунга қадар "Ювентус" билан ҳам ЕЧЛда иштирок этган. Аммо Контенинг ЕЧЛдаги иштироки доим муваффақиятли чиқмаган. Конте "Ювентус" билан ЕЧЛда гуруҳда қолиб кетган мавсумдан кейин истеъфога чиқарилганди. Ушбу мутахассис бошқарадиган жамоалар учта фронтда бир хил темпда ҳаракат қилишда муаммога дуч келади.
Конте "Челси" билан бу муаммони бартараф этиши лозим. Жорий мавсумда "Челси" нафақат АПЛда, балки ЕЧЛда ҳам муваффақиятли иштирок этишни мўлжалламоқда. Аммо гуруҳдан чиқишни ўзи ҳам ҳозирда ушбу "квартет"даги жамоаларга етарлича бош оғриқ тақдим этади.

"Рома" эса ўзгаришлар даврини бошдан ўтказмоқда. Рим императори Тоттининг жамоадан кетиши, Спалеттининг ўрнига Эйсебио Ди Франческо келиши жамоани янгиланаётганидан дарак.
Ҳозирги жамоа ўтган йилгига қараганда кучаймагани аниқ. Кучсизландими, деган саволга эса жавоб беришга шошилмай турган маъқул.
Трансфер бозорида ҳам жамоа асосан етакчиларини йўқотиш билан банд бўлди. Фақат биргина Коларовнинг жамоага қўшилиши чап қанотни жонлантиргани бор гап.

"Атлетико" ва Диего Симеоне эса ЕЧЛда қандай ўйнашни биладиганлар хилидан. Жамоа ҳар сафар камида ярим финалга қадар етиб келаётгани жамоанинг даражаси аллақачон топ клублар қаторига яқинлашганидан дарак беради. Шу боисдан ҳам "Атлетико"нинг бу йилги мақсадлари ҳам жиддий эканлигига шубҳа йўқ. "Квартет"да алоҳида бир жамоани ажратиб кўрсатиш лозим бўлса, унда "Атлетико" айтиш мумкин. ЕЧЛда ўйнаш хадисини олган "матрасчилар" Симеоненинг айёр тактик юришлари билан кўпчиликни қийнаб қўйишлари тайин.
Ушбу гуруҳда барча Антонио Конте ва Диего Симеоне қарама-қаршилигини кутмоқда. Иккита ҳимояда ўйнаш бўйича етук мутахассислар жанггида ким ғолиб чиқишини кўриш қизиқарли бўлади.
Аммо бу ўйинга қадар жамоалар биринчи турда бошқа рақиблар қаршилигига дуч келишади.

Гуруҳнинг ягона аутсайдер жамоаси - "Қорабоғ". Озарбойжоннинг "Қорабоғ" жамоаси биринчи бор ЕЧЛда иштирок этишади. Дебютант жамоа гуруҳда очко улашувчи рақибга айланиб қолмасликка ҳаракат қилишига шубҳа йўқ. "Қорабоғ"дан барча ҳар турда сенсация кутади. Буни улар қанчалик уддалай олишади ёки йўқ, буни вақт кўрсатади.
Муҳими, "Қорабоғ" мухлислари жамоасининг ҳар бир ўйинидан завқ олиши шубҳасиз. Ҳар турда жамоа гранд жамоаларга қарши тўп тепади. Маҳаллий ишқибозлар эса Конте, Симеоне ҳамда "Рома"даги юлдуз футболчиларнинг ўйинларидан баҳраманд бўлишади.
"Қорабоғ"нинг уй учрашувларининг барчаси ишқибозлар учун футбол байрамига айланиб кетади. Асосий мотивация шу.

Гуруҳдаги дастлабки ўйинда "Челси" дебютант "Қорабоғ"ни қабул қилса, Римда Симеоне қўмондонлиги остидаги "армия" меҳмон бўлади.
Римдаги ўйин голлар-шоусига айланиб кетиши ҳақиқатдан йироқроқ. Италия жамоасига қарши, италиялик мутахассис билан Диего Симеоне билан албатта тактик кураш бўлади. Бу ерда мураббийларнинг тактик салоҳиятлари барчасини белгилаб беради.

Гурбан Гурбанов эса Лондонда Антонио Контедан яхшигина маҳорат дарсини олиши шубҳасиз.

Тўртинчи гуруҳ, яъни "D" "квартети"га навбат.

Бу ерда Жаҳон футболининг икки "йўлбарс" жамоалари - "Барселона" ҳамда "Ювентус" бирга тушишган. Уларга "шер"лик қилиш вазифаси эса Грециянинг "Олимпиакос" ва Португалиянинг "Порту" жамоалари зиммасида.

"Ювентус" билан уч мавсумда иккита финалга чиққан ва иккисида мағлуб бўлган Аллегрининг мотивацияси аниқ. Бу сафар ўша иккита финалдаги аламли мағлубият учун ўч олиш. Бунинг учун эса "Ювентус" яна ҳаммасини бошқаттан бошлашга мажбур.
Трансфер бозорида фаоллик кўрсатган туринликларда йўқотиш ва янги харидлар етарлича бўлди. Бонуччи ва Дани Алвешнинг кетиши "Юве"ни кучсизлантирди, дейдиганлар адашади.
Чунки "Ювентус"дек жамоанинг биргина марказий ҳимоячи билан кучсизланиб қолиши ҳақиқатдан йироқ. Гарчи унинг номи Бонуччи бўлсада. Дани Алвеш борасида ҳам шу фикрни билдириш мумкин. Алвеш "Ювентус"нинг ўтган йили ЕЧЛдаги муваффақиятига етарлича ўз улушини қўшди. "Ювентус" эса унинг ўрнини Де Шильо билан тўлдирди. Бонуччининг ўрнига Хеведес сотиб олинди. Аммо ундан ташқари жамоа захирасида турган Ругани аста-секин асосий таркиб футболчисига айланмоқда. Бонуччининг ўрнига ворис сифатида айнан Руганини кўрсатиш мумкин. Ругани потенциал жиҳатдан Бонуччидан кучлироқ кўринмоқ.
Шунингдек, Дуглас Коста, Бернардески, Матюиди каби футболчилар ҳам "бьянконерилар"ни ўйинининг кучайишига хизмат қилиши аниқ.
Аммо ушбу харид қилинган футболчилардан фақатгина Матюиди асосий таркиб футболчисига айланди. Дуглас Коста ва Бернардески ҳозирча мослашиш жараёнида. Де Шильо эса ЕЧЛда жамоанинг асосий футболчиси бўлиши кутилмоқда. Чунки унинг нуқтасида ўйнайдиган Лихтштайнерни "Ювентус" ЕЧЛ қайдномасига киритмаган. Аллегри эса ўнг қанот ҳимоясида Де Шильони ёки ҳимоявий ўйнаш керак бўлиб қолган пайтда баъзан Барцальини ўйнатиши мумкин.

"Барселона"да ҳам ўтган йилги муваффақиятсизликдан сўнг ўзгаришлар кузатилди. Ёздаги трансфер бозоридаги ўзгаришлар ҳам "Барса" учун муваффақиятсиз бошланди. ПСЖ Неймарнинг "Барселона"дан юлиб кетиши бутун каталонияликлар учун яна бир қаттиқ зарба бўлди. Бундан кейин Неймарнинг ўрнини тўлдириш борасида ҳам клуб муаммоларга дуч келди. Сотиб олмоқчи бўлган футболчилари билан музокаралардаги чўзилишлар "Барселона" мухлисларининг юрагига ғулғула солди. "Ливерпуль"дан Коутиньо олиш амалга ошмаган бўлсада, аммо якунда "Барса" барибир Неймарнинг ўрнига кўзланган Дембелени нишонга олди.
Бу эса каталонияликларни бироз тинчлантирди.
Неймарнинг кетиши ва Дембеленинг келиш жараёнида "Реал"дан кўрилган талофат жамоа мухлислари юрагига яра пайдо қилганди. Бироқ мавсум бошланганидан кейин Эрнесто Вальверде "Барселона" билан кетма-кет ғалабаларни қўлга киритишни бошлади. Жамоа ўйини аста-секин ўз изига тушди. Примерода жамоа пешқадамга айланди. Кайфият буткул ўзгарди. Демак мавсум бошланиши арафасида муҳит ҳозирга келиб яхши томонга ўзгаргани аниқ.
"Олимпиакос" ва "Спортинг" эса "B" гуруҳидаги "Андерлехт" ҳамда "Селтик"ни ролида гавдаланишади. чиқмаган жондан умид, деганларидек, бу икки клуб ушбу "квартет"да шов-шув кўтаришга ҳаракат қилишади.

ЕЧЛда 1-турнинг марказий учрашуви шубҳасиз Каталонияда ўтади.
Ўтган йилги чорак финалдаги рақиблар яна ўзаро дуч келишади. "Барселона"нинг "Ювентус" алами бор, Мессининг эса Буффонга атаб қўйган голларини Леонинг ўзи ҳам соғиниб қолгани аниқ. Қария Жижи эса Мессининг зарбаларини қайтаришдан чарчамаяпти. Аргентина терма жамоасидаги Месси ва Дибала ўртасидаги бу сафарги дуэлда ким ғолиб чиқади? Мессими ёки Дибала? Ўтган йили Дибала Мессини мағлуб этганди. Бу галчи?
Аллегрининг тактик қарашларига Эрнесто Вальверде қай тариқа жавоб бера олади? "Ювентус" ҳар ҳолда Испания примеросидаги "Алавес", "Бетис" ёки "Эспаньол" эмаслигини унутмаган маъқул.
Вальверде "Барса" устози сифатида "Ювентус"га қарши яна бир жиддий имтиҳондан ўтади.

Бу ўйин "Барселона" ва Эрнесто Вальверде учун алоҳида муҳим аҳамият касб этади.
"Ювентус" ҳам ЕЧЛни кўтаринки кайфиятда бошлашни истайди. Аллегри илк учрашувдаёқ жиддий чорловга лаббай, деб жавоб қайтаришга тайёрми?
Бу тўқнашув атрофида саволлар жуда кўп. Аммо жавобни "Камп Ноу"даги баҳсдан сўнг оламиз.

Месси бугун нафақат Дибала билан, балки Буффон билан ҳам ўзаро ҳисоб-китобини амалга ошириши лозим.

Месси-Дибала қарама-қаршилигида ҳозирча Пауло ғолиб бўлиб турибди. Месси бу тўқнашувда ҳам тарози палласини ўз томонига оғдириб олишни эплай олармикан? Кўрамиз.

Гуруҳнинг иккинчи учрашуви Грецияда бўлиб ўтади. "Олимпиакос" "Караискаки"да "Спортинг"ни меҳмон қилади. Ҳозирча ўз чемпионатларида мағлубият нималигини билмай келаётган бу икки жамоаларнинг ўзаро тўқнашуви қизиқ ўтиши табиий. Гуруҳда ким иккинчи ва учинчи бўлишга даъвогарлик қилишини кўп жиҳатдан белгилаб берадиган баҳсда кичик устунлик ўз деворлари олдида ўйнайдиган "Олимпиакос" тарафида.