"Пахтакор": Грузияда Зураб Церетели юлдузи очилди

Сентябрь ойида Тбилисида жойлашган Михаил Месхи номли стадионда бир қатор машҳур футболчиларнинг шон-шуҳрат хиёбони очилди. Унда турли даврларда ўйнаган машҳур футболчилар хиёбонлари ишга туширилган. Улар қаторида жамоамизнинг собиқ ўйинчиси Зураб Церетели хиёбони ҳам очилган.

Церетели 1979 йил авиаҳалокатдан кейин "Пахтакор"га ёрдам бериш мақсадида таркибга жалб этилган. У жамоага ҳалокатда ҳаётдан кўз юмган дўстлари хотираси учун келганини кўп такрорлаб ўтган. Зураб Церетели 45 учрашувда жамоамиз учун 6 тўп киритган. 1981 йил унинг "Пахтакор"даги фаолияти якунланган ва мухлислар сўнгги ўйинда уни олқишлар билан кузатиб қўйишган.

Ўтган йили Грузия спорт делегациясининг мамлакатимизга ташрифи доирасида Церетелининг қизи Анна юртимизда бўлиб, отасининг Михаил Ан ва Владимир Фёдоров билан дўст бўлганини айтиб ўтганди.

1992 йил 8 январда Церетели Грузияда автоҳалокатда вафот этган. 38 ёшда вафот этган бўлишига қарамай, Зураб Грузия ва Ўзбекистонда ишқибозлар меҳрини қозонишга улгурганди.