"Пахтакор" 33 йилдан сўнг Тошкентда "Қайрат" билан ўйнайди

Рақиб сифатида Қозоғистоннинг "Қайрат" клуби танланди. Ушбу жамоалар ўртасидаги тўқнашувлар тарихи жуда узоққа бориб тақалади. 1956 йилдан бошланган ўзаро ўйинлар 1990 йилга қадар давом этган. 

Бу клублар ўзаро 50 марта тўқнаш келишган. "Қайрат" 21та баҳсда ғалаба қозонган, "Пахтакор" ҳисобида 18та ғалаба мавжуд, қолган 11та ўйинда дуранг қайд этилган. 

Бу жамоаларнинг охирги сўнгги расмий ўйини 1990 йилда СССР Биринчи лигаси 41-тури доирасида бўлиб ўтган. Ўша баҳснинг қайдномасини оригинал нусхасини қуйида тақдим этамиз: 

Сўнгги турдан олдин "Пахтакор" 52 очко билан иккинчи, Владикавказнинг "Спартак" клуби 55 очко билан биринчи ўринда эди. Ўша пайтларда ғалаба учун икки очко бериларди, шу боис "шерлар"да чемпионлик учун имконият йўқ эди, аммо иккинчи ўринни сақлаб қолиш учун ўз майдонида ғалаба қозониши керак эди. Сабаби учинчи ўриндаги "Металлург" (Запорожье) клуби сафида 51 очко бор эди. "Қайрат" эса охирги турдан аввал 30 очко билан 20та жамоа орасида 17-ўринда бораётганди. 

"Пахтакор" биринчи таймда Рифат Галиев ва Игорь Шквириннинг голлари эвазига олдинга чиқиб олади. 74-дақиқада "Қайрат" вакили Асан Кариев пенальтидан ҳисобни қисқартиради - 2:1. Асосий вақт тугашига 1 дақиқа қолганида бош ҳакам Купряшкин иккинчи бор мезбонлар дарвозаси томон пенальти белгилаган. Бу сафар Кариев "Пахтакор" посбони Александр Яновскийни алдай олмайди ва дарвозабон жамоасининг ғалабасини сақлаб қолади. "Пахтакор" ғалаба қозониб якунда СССР Биринчи лигаси кумуш медалларини қўлга киритиб, Олий лигага йўл олади. 

"Пахтакор" (Тошкент) - "Қайрат" (Алмати) - 2:1.

4 ноябрь 1990 йил. Тошкент. "Пахтакор" стадиони. 13000 томошабин.

Бош ҳакам: В.Купряшкин (Москва).

"Пахтакор": Александр Яновский, Нўъмон Ҳасанов (Сайдулло Турсунов, 60), Вячеслав Клочков, Миржалол Қосимов, Геннадий Денисов, Илҳом Шарипов, Сергей Бондаренко, Андрей Микляев (Владимир Бунтов, 65), Хорен Оганесян, Игорь Шквирин, Рифат Галиев.

Захирадагилар: Фарҳод Магометов, Сергей Андреев, Анвар Жабборов. 

"Қайрат": Вадим Гроздов, Аскар Кожабергенов, Ислам Аҳмедов, Пётр Нейштетер, Сергей Жуненко, Олег Чухлеба (Ен Гван Мин, 70), Юрий Риков (Кайрат Айманов, 84), Фанас Салимов, Александр Михель, Аскербек Енсенбаев (Асан Кариев, 36), Сергей Климов.

Захирадагилар: Сергей Бураков, Ли Чан Хо. 

Голлар: Рифат Галиев 4, - 1:0. Игорь Шквирин 27, - 2:0. Асан Кариев 74 пенальти, - 2:1. 

Огоҳлантириш: Кожабергенов ("Қайрат").

Амалга оширилмаган пенальти: Асан Кариев ("Қайрат") 89.