Павел Смоляченко: "Янги мавсумдан умидим катта"

- Таътилдан кейин машғулотларга киришиб кетиш осон бўлмаса керак?

- Ҳозирча тикланиш жараёнига асосий эътибор қаратилаётганлиги туфайли қийналаётганимиз йўқ. қолаверса, бундай ҳолатга илк бор дуч келмаяпман. Мавсум якунига етгач, таътилга чиқиб, бутунлай дам олишга берилмасдан, формани ушлаб туриш мақсадида оз-моз дўстлар билан футбол ўйнаб турдик.

- Дам олиш учун бирор мамлакатга бормадингизми?

- Яқинларимнинг ҳолидан хабар олиш учун Россиянинг Санкт-Петербург шаҳрида бўлдим. Шу баҳона ҳордиқ чиқариб қайтдим.

- Ўзингиз ўзбекистонликсиз-ку?

- Бир қатор қариндошларимнинг Россияга кўчиб кетишганига 10 йил бўлди. Бу ерда онам билан истиқомат қиламиз.

- Яқин орадаги режалар қандай? «Нефтчи»даги шартномангиз шу йил охирида якунига етса керак?

- Тугади. Музокаралар қандай натижа билан интиҳо топишини ҳозирча билмайман. Бошқа жамоаларга ўтиш ҳақида эса ўйлаб кўрганим йўқ.

- «Нефтчи»да қолиш сизга ҳар томонлама қулай эканлигини тахмин қилиш мумкин.

- Албатта. Келишувнинг қандай якун топишини кутайлик-чи.

- Жамоада етакчилардан бирига айланишдан ташқари юқори даражага чиқиб боришингизга кўпчилик умид билдиришда давом этмоқда.

- Янги даражага чиқишни хоҳлайман. Кейинги йилларда орттирган жароҳатлар кўп безовта қилди. Деярли етти ой майдон ташқарисида бўлдим. Ҳозир кўз тегмасин, ҳолатим ёмон эмас. Янги мавсумдан ўзимнинг ҳам умидим катта.

- Ўтган мавсумни жароҳатсиз ўтказгандингиз...

- Озгина омад етишмади. Ўзим ўйнаб ўрганмаган бошқа чизиқларда ҳаракат қилганлигим сабаб бўлгандир, билмадим.

- Таркиб ҳам деярли янгитдан шаклланди. Таклиф этилган ижрочилар билан тил топишиб кетиш анча вақт олади, тўғрими?

- Шубҳасиз якунланган чемпионатни биз учун омадсиз ўтди дейиш мумкин. Ҳеч биримиз ўзимизнинг ижобий томонимизни барқарор тарзда намоён эта билмадик.

- Янги мавсумдан нима кутмоқдасиз?

- Йўл қўйилган хатолар устида ишлаб, ҳаракатларимни маромига келтириб боришим зарур. Мусобақа жадвалида янада юқорироқ ўринда бўлишимизни истардим. 8-поғона  «Нефтчи»га ярашмайди.