Ўзбекистонсиз ўтаётган ОЧда Тожикистон ва Ҳиндистон иккинчи маротаба ЖЧда иштирок этишга яқин

Кечагидек ёдимизда, даставвал бизга бу қувончи Алексей Евстафеев бошчилигидаги терма жамоамиз тақдим этган эди. Ўзбекистонда бўлиб ўтган Осиё чемпионатида финалга қадар етиб борган 1994 йилда таваллуд топган футболчиларимиз Мексика йўлланмасини қўлга киритган эдилар. Орадан икки йил ўтиб Дилшод Нуралиев бошчилигида биз БААдаги мундиал чиптасига эга чиққанмиз.

Ўсмирлар ўртасида бўлиб ўтаётган Осиё чемпионатида иккинчи маротаба мундиалга чиқишга яқин турган Ҳиндистон ва Тожикистон терма жамоалари бунинг учун кореяликларни мағлубиятга учратишлари керак. КХДР қўшниларимиз билан баҳс олиб боришса, ҳиндлар жанубликларга қарши. Тожикистон терма жамоаси ЖЧдаги дебютини 2007 йилда амалга оширган эди. Ҳиндистон терма жамоаси эса 2017 йилги ЖЧ мезбони сифатида тўғридан-тўғри мусобақада қатнашган.

Осиё терма жамоалари ичида ЖЧда иштирок этиш бўйича энг яхши кўрсатгич кун чиқар юрт вакилларида. Лекин ҳеч бир осиёлик Саудия Арабистонига тенг кела олмайди. Саудияликлар Шотландияда бўлиб ўтган мундиал финалида мезбонларни пенальтилар сериясида мағлубиятга учратган ҳолда чемпионликни қўлга киритган эдилар.

Афсуски 2008 йилдан бери мунтазам равишда Осиё чемпионатида иштирок этиб келган терма жамоамиз, 2018 йилги мусобақадан четда қолди.

Қуйида ЖЧда энг кўп иштирок этган терма жамоалар рўйҳати билан танишишингиз мумкин.

Япония - 8
Қатар - 7
Хитой - 6
Жанубий Корея - 5
Эрон - 4
Уммон - 3
БАА - 3
Саудия Арабистони - 3
Баҳрайн -2
Ўзбекистон - 2
Ироқ - 2
Сурия - 2
Таиланд - 2
Яман - 1
Ҳиндистон -1
Тожикистон - 1

Википедия маълумотлари асосида