Ўзбекистонлик ҳакам ва назоратчилар U-19 Осиё чемпионати саралашида ишлайди

U-16 ва U-19 ОЧ саралаш баҳсларида ўзбекистонлик назоратчи ва ҳакамлардан ташқари ЎФФ матбуот хизмати бошлиғи Санжар Ризаев ҳамда ЎФФ техник бўлими бошлиғи Олим Арифовлар комиссарлик қиладилар. Жумладан, Санжар Ризаев 21-29 сентябрь кунлари Кувайт мамлакати мезбонлик қиладиган U-16 ОЧ саралаш «А» гуруҳи ўйинларига комиссар сифатида жалб этилган бўлса, Олим Арифов 25-29 сентябрь кунлари Иорданиянинг Амман шаҳрида бўлиб ўтадиган U-16 ОЧ саралаш «D» гуруҳи ўйинларида комиссарлик қилади.

Ўзбекистонлик назоратчи ҳакам, ФИФА инструктори Фарҳод Абдуллаев 8-12 октябрь кунлари Хитойнинг Жечианг шаҳрида бўлиб ўтадиган U-19 ОЧ саралаши «I» гуруҳи ўйинларида ишлайди. Ушбу гуруҳда мезбон - Хитойдан ташқари Япония, Малайзия ва Макао ҳам иштирок этади.

Бош ҳакам Владислав Цейтлин ва ён қанот ҳаками Ҳусниддин Шодмонов 4-12 октябрь кунлари Иордания пойтахти Амман шаҳрида бўлиб ўтадиган U-19 ОЧ саралаши «В» гуруҳи ўйинларида ишлайди. Ушбу гуруҳда финал босқичи йўлланмаси учун Иордания, БАА, Яман, Мальдив ва Афғонистон кураш олиб боради.

Ўзбекистонлик ён қанот ҳаками Жаҳонгир Саидов U-19 ОЧ «С» саралаш гуруҳи ўйинларида ишлайди. 8-12 октябрь кунлари Ироқнинг Арбил шаҳрида бўлиб ўтадиган баҳсларга таклиф этилган бош ҳакамлар орасида, маълумот учун, туркманистонлик Чоримурод Қурбонов ҳам бор. Ушбу саралаш гуруҳида, Ироқдан ташқари, Кувайт, Покистон ва Бангладеш терма жамоалари ҳам иштирок этади