Ўзбекистон ёшлар терма жамоаси Ироқ ёшларига қарши «Пахтакор» стадионида ўйнайди

ЎФФ Терма жамоалар маркази берган маълумотга кўра, Ўзбекистон ҳамда Ироқ ёшлар терма жамоалари ўртасидаги ўйинлар Тошкентдаги «Пахтакор» стадионида бўлиб ўтади. Учрашувнинг бошланиш вақтлари соат 17:30га белгиланган.

Маълумот ўрнида, Ўзбекистон ёшлар терма жамоаси (U-20) 5-7 май кунлари Тошкентда икки кунлик йиғин ўтказган ва мазкур йиғинда терма жамоа бош мураббийи Аҳмаджон Мусаев жами 30 нафар футболчини синовдан ўтказган эди. Терма жамоа бош мураббийи Аҳмаджон Мусаев Ироқ ёшларига қарши ўйин терма жамоанинг айни дамдаги ҳолатини текшириб олиш учун яхши имконият эканлигини таъкидлади. «Ироқ ёшлар терма жамоасига қарши иккита ўртоқлик учрашувида майдонга тушамиз. Мазкур ўйинлар орқали терма жамоа футболчиларнинг июнь ойида бошланадиган жаҳон чемпионати баҳслари олдидан функционал ва жисмоний тайёргарлигини текшириб олиш имконияти бўлади», - дейди Аҳмаджон Мусаев.

Эслатиб ўтамиз, Ўзбекистон U-20 ёшлар терма жамоаси июнь ойи сўнггида Туркияда старт оладиган U-20 ёшлар ўртасидаги жаҳон чемпионатидаги иштирокини бошлайди. Мусаев шогирдлари мусобақанинг «Е» гуруҳида Янги Зеландия, Хорватия ҳамда Уругвай ёшлар терма жамоаларига қарши баҳс олиб борадилар.