Ўзбекистон U-17 ўсмирлар терма жамоаси Тошкентда Эрон ўсмирларига қарши ўйнайди

Дилшод Нуралиев бош мураббийлигидаги Ўзбекистон ўсмирлар терма жамоаси 17 август куни Тошкентда ўзининг навбатдаги йиғинини бошлайди. Ушбу йиғин давомида Ўзбекистон ўсмирлар терма жамоаси Эрон ўсмирлар терма жамоасига қарши 3та ўртоқлик-назорат ўйинини ўтказади. Ўзбекистон ҳамда Эрон ўсмирлари ўртасидаги ўйинлар 18, 20, 22 август кунлари Тошкентдаги «ЖАР» стадионида бўлиб ўтади.

Қайд этиш лозим, Ўзбекистон ҳамда Эрон ўсмирлар терма жамоалари ўзаро илк маротаба 2011 йилда Остонадаги халқаро турнирда куч синашган ва ўша ўйинда 1:1 ҳисоби қайд этилган эди. Орадан бир йил ўтиб, терма жамоалар Эронда бўлиб ўтган U-16 ўсмирлар ўртасидаги Осиё чемпионати баҳсларининг ярим финалида яна бир бора тўқнаш келишди. Ярим финал учрашувида Дилшод Нуралиев шогирдлари 3:2 ҳисобида ғалаба қозонган эдилар. Якунда, Ўзбекистон ўсмирлар терма жамоаси Осиё чемпионатининг финал учрашувида Япония ўсмирлар терма жамоасини мағлуб этиб, ўз тарихида илк маротаба Осиё чемпионати ғолибига айланган эди.

Тошкентда Эрон ўсмирлар терма жамоасига қарши бўлиб ўтадиган учрашувлар, Нуралиев шогирдлари учун шу йилнинг 17 октябрь - 8 ноябрь кунлари БАА мамлакатида бўлиб ўтадиган U-17 ўсмирлар ўртасидаги жаҳон чемпионати финал босқичи ўйинлари олдидан тайёргарлик вазифасини ўтайди. Маълумот ўрнида, ўсмирлар ўртасидаги жаҳон чемпионати баҳслари финал босқичига қуръа ташлаш маросими 26 август куни Абу-Даби шаҳрида бўлиб ўтади. Қуръа ташлаш маросимида Ўзбекистон ўсмирлар терма жамоаси бош мураббийи Дилшод Нуралиев ҳамда терма жамоа сардори Отабек Шукуров иштирок этадилар.

Тошкентдаги йиғинга чақирилиган футболчилар рўйхати.