Ўзбекистон оқ, Жанубий Корея қизил рангда ўйнайди

ЖЧ-2014 саралаш 4-босқич «А» гуруҳи 9-тур учрашувлари доирасидаги Жанубий Корея ва Ўзбекистон миллий терма жамоалари ўртасидаги учрашув арафасида терма жамоаларнинг менежерлари ўртасида митинг бўлиб ўтди.

Митингда терма жамоалар бўлажак учрашувда қайси рангдаги либосларда ҳаракат қилишлари маълум бўлди. Шундай қилиб, Жанубий Корея миллий терма жамоаси сешанба куни анъанавий қизил футболка ва кўк шортларда ҳаракат қилса, Ўзбекистон миллий терма жамоаси тўлиқ оқ либосларда тўп суради.

10 июнь куни, шунингдек, бошқа бир қатор ўйинолди тадбирлар ҳам бўлиб ўтади. Жумладан, Тошкент вақти билан 14:30да (Сеул вақти билан 18:30да) Ўзбекистон миллий терма жамоаси бош мураббийи Миржалол Қосимов иштирокида ўйинолди матбуот анжумани ўтказилади. Матбуот анжумани якунига етганидан сўнг, Тошкент вақти билан 15:00да (Сеул вақти билан 19:00да) «Seoul World Cup» стадионида Ўзбекистон миллий терма жамоаси футболчилари расмий ўйинолди машғулотларини ўтказишади.

Эслатиб ўтамиз, Жанубий Корея ва Ўзбекистон миллий терма жамоалари ўртасидаги ЖЧ-2014 саралаш учрашуви 11 июнь, сешанба куни 16:00да бошланади.