Ўзбекистон МТЖ. Иккинчи кунги машғулотлар ҳақида

Бугун, 3 октябрь куни ҳам Вадим Абрамов бошчилигидаги терма жамоамиз аъзолари "Жар" стадионида машғулот ўтказишди. Таркибда ўзгаришлар кузатилмади, худди кечагидек 24 нафар футболчи шуғулланди. Тўрт нафар легионер шу кунларда терма жамоа ихтиёрига келиб қўшилишади.

Уч нафар посбон билан доимгидек Денис Иванков ишлади. Биринчи кунги машғулотларни индивидуал тарзда ўтказган Хожиакбар Алижонов умумий гуруҳга қайтди. Терма жамоамиз шифокори Аброр Пирриевнинг айтишича Алижоновда кичик шамоллаш кузатилгани учун дастлабки куни у якка тартибда ишлаган.

Абрамов терма жамоага қайтгач машғулотлар бутунлай очиқ бўлаётгани журналистларни қувонтираётгани аниқ. Бироқ баъзи ҳамкасбларимизнинг буни суиистеъмол қилишаётгани кўнгилни бироз хира қилди. Жаҳон чемпионати саралаш баҳсларига тайёргарлик кўраётан терма жамоанинг машғулотлари вақтида (!!!) улардан майдоннинг ўзида (!!!) интервью олишга ҳаракат қилиш ташқаридан жуда ва жуда хунук кўринди.

Тез орада сайтимизга иккинчи кунги машғулотлардан видеолавҳа ҳамда Лутфулла Тўраев билан қисқа интервьюни жойлаймиз. Шундай экан Championat.asia сайтини ва унинг ютубдаги расмий каналини кузатиб боринг.