Ўзбекистон Кубоги. "Пахтакор" - "Локомотив". Превью

Тошкентда "Пахтакор" "Локомотив"ни қабул қилади. Ўтган жума куни ТТЙМИ стадионида кечган учрашувда "Локомотив" Иброҳим Раҳимовнинг ягона голи эвазига ғалаба қозонганди. Жамоамиз финалга йўл олиши учун 2 тўп фарқи билан ғалаба қозониши зарур. Агар асосий вақт 1:0 ҳисобида якунланса, унда қўшимча бўлимларга мурожаат қилинади. Шунда ҳам натижа сақланиб қолса, унда пенальтилар сериясига мурожаат этилади.

Жамоалар таркибида дисквалификация сабабли майдонга туша олмайдиган футболчилар йўқ. Жароҳатлар халал бермаган тақдирда барча етакчи ўйинчиларнинг ҳаракатларига гувоҳ бўлишимиз мумкин. Учрашув 1 июль, сешанба куни "Пахтакор" Марказий стадионида соат 19:30да бошланади.

Беллашувни Валентин Коваленко бошчилигидаги ҳакамлар гуруҳи бошқариб боради. Ушбу рефери биринчи даврада 2:2 ҳисобида якунланган баҳсни бошқарганди. "Локо"нинг чемпионатда "Металлург" ва кубокда "Динамо" билан Самарқанддаги ўйинларини бошқарган.

"Пахтакор" - "Локомотив" баҳсига ташриф буюриб, "Соғлом бола йили"га бағишланган "Омадли мухлис" ижтимоий акциясида иштирок этиш ва эсдалик совғалари сифатида 2та смартфон, U Cell ва Sharq Telecom компанияларидан эсдалик совғалари, Fitness House соғломлаштириш марказидан бепул ойлик абонементини ютиб олиш имкониятига эга бўласиз. Чипталарни "Пахтакор" Марказий стадиони кассаларидан харид қилишингиз мумкин. Чипта нархи 5000 сўм. Барчани жамоамиз учун муҳим бўлган учрашувга таклиф этамиз.


"ПАХТАКОР" - "ЛОКОМОТИВ"

Ҳакамлар: Валентин Коваленко (Тошкент), Рафаэль Илёсов (Тошкент), Маъмур Саидқосимов (Тошкент), Дмитрий Пислегин (Тошкент).

Назоратчи: Александр Попов (Тошкент).