Осиё Кубоги-2019. Австралия гуруҳдан чиқа олмаслиги мумкин

"B" гуруҳида Иордания терма жамоаси муддатдан аввал 1-ўринни нақд қилиб бўлган. Сўнгги турда Фаластинга ютқазиб қўйса ҳам Иордания биринчи ўринни ҳеч кимга бермайди.

Иккинчи баҳсда Австралия ва Сурия тўқнаш келади. Австралия гуруҳда иккинчи бўлиши учун дуранг ҳам етарли бўлади. Сурия эса кейинги босқичга чиқмоқчи бўлса фақат ва фақат ғалаба қозониши шарт.

Иордания ҳамда Фаластин давлатлари ўртасида дўстлик ришталари бор. Шу боис ҳам Иордания ўз қўшнисига ютқазиб бериши эҳтимоли бор. Агар бугун ҳақиқатдан ҳам шундай бўлиб, Фаластин ғалаба қозонса кейинги босқичга чиқади. Сурия эса сенсация намойиш этиб Австралиядан устун келса 2015 йилги Осиё чемпиони БААда гуруҳ босқичидан сўнг ўз уйига жўнаб кетади.

Эслатиб ўтамиз, 1/8 финалда бу гуруҳда 2-ўринни олган жамоа Ўзбекистон ўрин олган гуруҳда 2-ўринни банд этган жамоа билан тўқнаш келади.