Ўртоқлик учрашуви. "Динамо" "Шўртан"ни мағлуб этди

Самарқанддаги «Динамо» ўйингоҳида бўлиб ўтган баҳс анча томошабоп руҳда ўтди. Жамоалар назорат ўйинида эмас, расмий баҳсда майдонга тушгандек ҳаракат қилишди. Тенгкурашлар остида ўтган дастлабки бўлимда ҳисоб очилмади. Танаффусдан сўнг эса мураббийлар Илҳом Шарипов ҳам, Ихтиёр Каримов ҳам таркибда бир қатор ўзгаришларни амалга оширишди. Бу ўзгаришлар мезбонларга ижобий таъсир қилди.

Ўйиннинг 69-дақиқасида қанотдан ҳужумга киришган ёш «динамочилар» ҳисобни очишди. Ёш ҳимоячи Ҳакимхон Аъламхонов ғузорликлар ҳимоячиси Асрор Алиқулов ва дарвозабон Алибек Туроповдан илдамроқ ҳаракат қилиб тўпни дарвозага киритди, 1:0.

Ўтказиб юборилган голдан кейин воҳаликлар ҳужумкорликка эътибор қаратишди. Натижада орадан беш дақиқа ўтиб, учрашув бош ҳаками Шерзод Камаров «Динамо» ҳимоячиси қўполлик билан «Шўртан» ҳужумчисини тўхтатди дея ҳисоблаб, пенальти белгилади. 11 метрлик нуқтага яқинлашган тажрибали ҳужумчи Зафар Полвоновнинг зарбасини эса ёш дарвозабон Шуҳрат Муродов ажойиб реакция билан бартараф этди.

Ўйиннинг сўнгги дақиқаларида эса самарқандликлар қарши ҳужумда рақибни яна бир марта жазолашди. 18 ёшли ҳужумчи Асомиддин Маматов ғузорликлар ҳимоя қўрғонини доғда қолдириб, ҳисобни 2:0 кўринишга олиб келди.

25 июль (душанба)

Назорат учрашуви.

Самарқанд, «Динамо» стадиони.

«ДИНАМО» - «ШЎРТАН» - 2:0
Бош ҳакам: Шерзод Камаров
Голлар: Ҳакимхон Аъламхонов 69, Асомиддин Маматов 89.

«Динамо»: Михаил Наумов, Алексей Николаев, Убайдулло Набиев, Бунёд Исроилов, Акмал Бозоров, Жонибек Кўчимов, Ислом Шарипов, Искандар Холмирзаев, Жасур Азимов, Алишер Холиқов, Амиржон Сафаров.
Захирадан майдонга тушганлар: Шуҳрат Муродов, Ҳакимхон Аъламхонов, Лазиз Нуриддинов, Омаджон Тайлоқов, Комил Шарофутдинов, Миркомил Локаев, Орзумурод Аҳмедов.

«Шўртан»: Элдор Тожибоев, Ҳасанбой Эргашев, Аббос Омонов, Суннатилла Мамадалиев, Умарбек Эшмирзаев, Лазиз Убайдуллаев, Холмурод Холмуродов, Элдор Бойматов, Маъруфхон Муродов, Фаррух Ҳайдаров, Зафар Полвонов.
Захирадан майдонга тушганлар: Алибек Туропов, Асрор Алиқулов, Олимжон Каримов, Ғулом Раҳмонов, Шаҳзод Хурсандов, Юсуф Бўриев, Мирмуҳсин Сатторов, Вусол Магерамов.