Олмалиқда спорт шаҳарчаси фойдаланишга топширилади

Мажмуанинг кўрки сифатида 12 минг томошабинга мўлжалланган стадион қад ростлаган. Янги мавсумда бу ўйингоҳда "Олмалиқ" жамоаси ўз уй учрашувларини ўтказади. Режага, кўра, ушбу мажмуа "Наврўз" умумхалқ байрами арафасида тантанали равишда очилади ва фойдаланишга топширилади. Бу ҳақда "Олмалиқ тоғ-кон металлургия" комбинати ОАЖ бош директори Александр Фармонов ўз интервьюсида айтиб ўтди.

Александр Касимовичнинг сўзларига кўра, ҳозирги стадион ҳам клубга хизмат қилишда давом этади. Мажмуанинг ўзига тўхталадиган бўлсак, унинг ҳудудидаги эгизак биноларни эслатувчи 70Х38 ҳажмдаги иккита спорт зали спорт шаҳарчаси кўркига янада кўрк қўшиб турибди. Спорт залларининг бири футзал, баскетбол, воллейбол, қўл тўпи каби жамоавий спорт турлари учун мўлжалланган. Иккинчисида эса, асосан яккакураш (бокс, кураш, дзюдо, самбо, эркин ва юнон-рум кураши, каратэ, таэквондо каби) спорт турлари бўйича кундалик машғулотлар, шунингдек, турли нуфуздаги мусобақалар ўтказилади. Ҳар икки спорт залида кийиниш-ечиниш, ҳакамлар ва тиббиёт ҳодимлари учун хоналар  мавжуд. Спорт залининг иккинчи қаватида 500 томошабинга мўлжалланган трибуна ҳам бунёд этилган.

Бундан ташқари, мажмуада ёпиқ теннис корти ҳам бор. Шунингдек, очиқ теннис корти ҳам бўлиб, унинг икки томонида мухлислар учун махсус трибуналар қурилган. Таҳминан 2000  томошабин бу ерда ўтказиладиган нафақат теннис, балки бокс мусобақаларини ҳам кузатиш имкониятига эга бўлади. Стандарт ҳажмдаги сунъий қопламали футбол майдони айниқса, қишки мавсумда "Олмалиқ" жамоасининг машғулотларига ас қотади.

Энг муҳими, мажмуа ичида ҳам, стадионга кираверишда ҳам машиналар тўхташ жойлари бунёд этилган. Бир сўз билан айтганда, бу мажмуа Олмалиқ аҳли учун баҳор байрамига ҳақиқий совға бўлади.