"Олмалиқ": Янги мавсумга тайёргарлик бошланди ёхуд Станоевич ва Франжич кетди

2014 йилги чемпионатда 6-ўринни эгаллаган "Олмалиқ" қайд этган натижа аввалгисига қараганда бир поғона паст бўлди. Йилдан йилга ўз таркибини шакллантириб, юқори натижалар сари интилаётган жамоа учун бу кўрсаткич қониқарли эмас, албатта. Шу сабабли, жамоа раҳбарияти навбатдаги мавсумда таркибда бир қатор ислоҳотлар амалга оширишни режалаштирган. Бугундан Олмалиқда бошланган машғулотларда бир қатор етакчи футболчилар иштирок этишмади. Жумладан, Шакер Зуаги, Обид Жўрабоев ва Достон Абдураҳмонов "Бунёдкор"да ўтишга яқин бўлса, Дарко Станоевич ва Петар Франжич ҳам жамоа таркибини тарк этган. Яна бир қатор футболчиларнинг ҳам жамоада қолиш қолмаслиги 27 декабрга қадар давом этадиган машғулотлардан сўнг маълум бўлади.

Дастлабки кунги машғулотда қуйидаги футболчилар иштирок этишди: Умид Хонимқулов, Акмал Ортиқов, Тимур Ғаниев, Шоҳрух Эшбўтаев, Жаҳонгир Жиямуродов, Сарвар Жўраев, Абдумалик Тошпўлатов, Абдуқаҳҳор Ҳожиакбаров, Азамат Исроилов, Зоҳир Пиримов, Санжар Шоаҳмедов, Дилявер Абибуллаев, Диёр Туропов, Никита Павленко, Муҳаммад Исаев, Зафар Полвонов, Ислом Исоқжонов, Дониёр Исмоилов, Шариф Мирзаев, Қадамбой Нурметов.

Бироз бетоблиги сабаб Тимур Кагиров ва Аброр Каримов машғулотда иштирок этмади. Тимур Ҳакимовнинг ижара муддати якунига етганлиги боис, "Пахтакор"га қайтган.