"Олмалиқ": 10 нафар футболчи кетди, Наумов ва Бердимуродов келди

"Олмалиқ"нинг дастлабки йиғини декабрь ойида бўлиб ўтганини хабар берган эдик. Иккинчи йиғин 4 январдан 13 январга қадар давом этади. Жамоа аъзолари 8 январь куни тиббий кўрикдан ўтади. 10 январда Тошкентнинг "Бунёдкор" жамоаси билан назорат ўйини ўтказиш режалаштирилган. Таркибдаги ўзгаришлар борасида айтадиган бўлсак, жамоани бир қатор футболчилар тарк этишди. Улар Валерий Фомичёв, Тимур Ғаниев, Сарваржон Жўраев, Сахоб Жўраев, Обид Жўрабоев, Ғулом Ўрунов, Жаҳонгир Абдумўминов, Саламат Қутибоев, Шавкат Саломов, Неманья Йованович ва Алишер Шоғуломовлардир. Бу футболчиларга "Олмалиқ" жамоаси натижаларига қўшган ҳиссалари учун ташаккур билдирамиз ва кейинги фаолиятларида омад тилаймиз.

Жамоанинг бугунги машғулотларида 25 нафар футболчи иштирок этди. Биринчи йиғинда кўрикда бўлган уч нафар футболчи Фаррух Ахунов, Дониёр Иномов ва Роберт Жилин бу гал машғулотларга чақирилмади. Машғулотларга жамоамиз аъзолари икки дарвозабон Никита Шквирин ва Максим Криушев ҳамда олимпия терма жамоаси йиғинида бўлган Диёр Туропов ва Дониёр Исмоиловлар қўшилишди. Шунингдек, яна бир посбон Михаил Наумов, ҳимоячи Раҳматилло Бердимуродов, ярим ҳимоячи Дилшод Файзиев ("Намуна", Тошкент), ҳужумчи Тимур Эргашев ("Чуст-Пахтакор")лар ҳам "Олмалиқ" таркибида янги мавсумга тайёргарлик олиб боришмоқда.

Бундан ташқари, жамоа мураббийлар штабига ўтган мавсум Ғузорнинг "Шўртан" жамоасида фаолият олиб борган Жамшид Умаров қабул қилинди. Жамшид Хуршидович жисмоний тайёргарлик бўйича мураббий ҳисобланади.