Олий лига. "Нефтчи"нинг ғалати статистикаси

Бу мавсум ҳам "Нефтчи" ўзига, шонли тарихига ярашмаган 11-ўринни эгаллаб турибди.

Жамоанинг бу йилги ўйинларига назар ташлаб, ғалати статистикага гувоҳ бўлдик. Агар Олий лиганинг энг кучли тўрт клуби билан кечган беллашувларни ёдга оладиган бўлсак, "Нефтчи" ўз майдонида "Бунёдкор" ва "Пахтакор"ни мағлуб этди, "Локомотив" ва "Насаф" билан дуранг ўйнади. Одатда ўз майдонида грандлардан очко оладиган жамоа чемпионатда яхши иштирок этиши керак.

Лекин "Нефтчи"ни бундай деб бўлмайди. Фарғоналиклар охирги бешта учрашувдан фақат биттасида ғалаба қозонишди. Тўртта ўйинда эса мағлубиятга учради. Жамоа биринчи даврада ҳартугул олти бор ғалаба қозонганди. Иккинчи даврада эса ҳозирча 3та ғалаба мавжуд. Қолаверса, "Нефтчи"нинг 6та ғалабадан иккитаси сафарда қўлга киритилгани эътиборга молик. Аммо иккинчи даврада Андрей Фёдоров шогирдлари ҳозирча сафарда ғалаба қозонишгани йўқ. Жамоа сафарда бўлиб ўтган ҳамма ўйинларда имкониятни бой берди.

"Нефтчи"нинг ғалати статистикаси шундаки, жамоа керак бўлса ўз майдонида кучли тўртлик жамоаларининг "додини" бера оляпти-ю, лекин "Сўғдиёна", "Андижон", "Машъал", "Обод", "Қўқон-1912" каби клубларга кутилмаганда ютқазиб қўйяпти. Нима сабабдан бундай бўлаётгани эса бизга қоронғи.