Олий лига. 11-тур рамзий терма жамоаси

Дарвозага "Машъал" клуби посбони Жавоҳир Илёсовни қўйишга қарор қилдик. Қашқадарё дербисида Илёсов ўзини яхши томонлама кўрсатди. "Насаф" футболчиларининг бир қатор зарбаларини қайтарган Жавоҳир рамзий термадан ўрин олди. Унинг ўтказган ягона голини эса ҳеч қайси дарвозабон қайтара олмас эди.



"Қўқон-1912" ҳимоячиси Дарко Гожкович "Локомотив" билан ўйинда жамоаси учун муҳим голни уриш билан бирга рақиб вакилларига қарши жуда яхши ўйнади.



"Сўғдиёна" ўз майдонида "Шўртан"ни мағлуб эта олди. Ушбу учрашувда жиззахликлар ҳимоячиси Сардор Қулматов ўзини яхши томонлама кўрсата олди.

"Нефтчи" Навоийда "Қизилқум" билан 2:2 ҳисобида дуранг ўйнади. Жамоа ҳимоячиси Ҳамза Каримов ҳимояда жуда фаол ҳаракат қилди ва рамзий термадан ўрин олди. 

"Қизилқум" вакили Файзулла Қамбаров ҳам рамзий терма жамоасидан ўрин олди. Қамбаров ҳимоячи бўлишига қарамай гол уришга муваффақ бўлди. 



"Обод" ўз мухлислари қаршисида олий лигага қайтган "Динамо"ни қабул қилиб 3:1 ҳисобида зафар қучди. Тошкентликлар сардори Дониёр Ҳасанов учрашувда чиройли гол урди ва баҳс давомида жамоаси ўйинини бошқарди.

"Насаф" ярим ҳимоячиси Ислом Рашидхонов "Машъал" билан ўйин тақдирини ҳал қилган голни урди. Ёш футболчи ўз устида ишлашда давом этса кейинги турларда ҳам рамзий термадан ўрин олаверади.



"Бунёдкор" ярим ҳимоячиси Достонбек Ҳамдамов Тошкент дербисида ҳисобни очди. Бундан ташқари қанотда рақибни бир неча марта алдаб ўтишга эришди ва жамоаси ҳужумини бошлади.

"Локомотив" вакили Жалолиддин Машарипов Қўқондаги баҳсда фаол ва чаққон ҳаракатлари билан ажралиб турди. У жамоаси ҳужумларини ташкил қилишда бошқалардан устунлик қилди.

"Олмалиқ" Тошкент вилояти дербисида "Металлург"ни мағлуб этишга эришди. Виктор Кумиков бошчилигидаги жамоада Шохназар Норбеков навбатдаги ўйинда ҳам ҳужумдаги тезкор ҳаракатлари билан ажралиб турди. Айнан Норбековнинг ҳаркатларидан сўнг пенальти белгиланди.



Неманья Йованович "Навбаҳор"нинг сафардан 1 очко билан қайтишига катта хисса қўшди. Ҳужумчи бурчак тўпидан сўнг иккита гол урди.

Дарвозабон
Жавоҳир Илёсов ("Машъал") (3-марта рамзий терма жамоада)

Ҳимоячилар
Дарко Гожкович ("Қўқон-1912")
Сардор Қулматов ("Сўғдиёна")
Файзулла Қамбаров ("Қизилқум") (2)
Ҳамза Каримов ("Нефтчи")

Ярим ҳимоячилар
Дониёр Ҳасанов ("Обод")
Ислом Рашидхонов ("Насаф")
Достон Ҳамдамов ("Бунёдкор")
Жалолиддин Машарипов ("Локомотив") (3)

Ҳужумчилар
Шохназар Норбеков ("Олмалиқ")
Неманья Йованович ("Навбаҳор") (2)