Одилжон Абдураҳмонов Қирғизистон миллий терма жамоаси сафида гол урди

“Бунёдкор” сафида тўп сураётган легионерлар Давронжон Эргашев ҳамда Одилжон Абдураҳмонов Тожикистон ва Қирғизистон миллий терма жамоаси таркибида ўртоқлик учрашувида майдонга тушди. Тожикистон миллий терма жамоаси Нурсултонда Қозоғистон меҳмони бўлиб, 1:0 ҳисобида мағлубиятга учради. Давронжон Эргашев беллашувда 90 дақиқа тўп сурди ва 75-дақиқада ҳакам томонидан огоҳлантирилди.

Қирғизистон миллий терма жамоаси эса, ФИФА кунлари доирасида иккита ўйин ўтказди. 11 ноябрь куни БААнинг Шаржа шаҳрида Сингапур 2:1 ҳисобида мағлубиятга учратилган бўлса, орадан беш кун ўтиб Риффада Баҳрайн қўшниларимиздан устун келди – 4:2. Аҳамиятлиси, мазкур беллашувда жамоа ярим ҳимоячиси Одилжон Абдураҳмонов ҳисоб 1:1 кўриниш олиб турган вақтда қирғизистонликларнинг иккинчи голига муаллифлик қилди. Абдураҳмонов узоқ масофадан ажойиб зарба йўллаб, мезбонларни майдон марказига чорлади. Аммо бу гол Қирғизистон миллий терма жамоасининг ғалабасига етарли бўлмади, якунда мағлубиятга учради.