Одил Аҳмедов: "Академиямиздан жаҳон майдонларини забт этадиган футболчилар етишиб чиқади"
29 дек 2020 15:55
Новости

Одил Аҳмедов: "Академиямиздан жаҳон майдонларини забт этадиган футболчилар етишиб чиқади"

Ўзбекистон миллий жамоаси ҳамда Хитойнинг "Тианжин Теда" клуби футболчиси Одил Аҳмедов Мустақиллигимизнинг 29 йиллиги муносабати билан "Ўзбекистон Республикасида хизмат кўрсатган спортчи" фахрий унвони билан тақдирланган эди.

Кеча, 28 декабрь куни Кўксаройда мукофотларни топшириш маросими бўлиб ўтди ва унда Одил Аҳмедов Ўзбекистон Республикаси Президенти Шавкат Миромонович Мирзиёевдан мукофотни қабул қилиб олди.

"Авваламбор юксак мукофот учун барча футболчилар номидан миннатдорчилик билдираман. Бу мукофот мен учун жуда ҳам катта куч ва ишонч, мотивациядир. Давлат раҳбари сифатида илк бор иш бошлаган кунингиздан бошлаб футбол ривожига катта эътибор қаратдингиз. 2019 йил ўзбек футболини ривожлантириш борасидаги фармонингиз тарихий фармон бўлди дея оламан.

Шу фармондан руҳланиб Наманган ва Тошкент шаҳрида ўзимнинг хусусий футбол академиямни очдим. Бу академияда 250 нафарга яқин ёш футболчилар шуғулланиб келишмоқда. Ишонтириб айтаманки, уларнинг орасидан Ўзбекистон байроғини юқорига кўтарадиган, жаҳон майдонларини забт этадиган футболчилар етишиб чиқади. Яна бир бор ишонч, юксак унвон учун оилам номидан, барча спортчилар номидан раҳмат айтаман",- дейди Одил Аҳмедов.