ОЧЛда Ўзбекистонга 4та ўрин берилиши мумкин...

Маълумотларга кўра, 1 ноябрга қадар Ўзбекистон чемпионатида иштирок этувчи 4та жамоа Осиё чемпионлар лигасида иштирок этиш учун тегишли ҳужжатларни ОФКга тақдим этиши керак. Айни пайтда 2014 йилги мавсумда халқаро майдонларда биздан нечта жамоа иштирок этиши номаълум. Бироқ ОЧЛда мунтазам иштирок этиб келадиган ҳар бир мамлакат ўзидан 4та жамоа номини маълум қилиши лозим. Катта эҳтимол билан 4та ўриндан 2таси тўғридан тўғри гуруҳ ўйинларида иштирок этади. Агар бу қарор кучга кирса, Ўзбекистон шарафини "Бунёдкор" ва "Локомотив" жамоалари лига ўйинларида ҳимоя қиладилар. Плей-офф ўйинларида эса "Насаф" ва "Пахтакор" гуруҳ босқичи учун кураш олиб боради. Янги мавсумда плей-офф ўйинлари уй-сафар тизимида ўтказилади. Шунингдек, 1+1, 1+2, 1+3, 2+1 ва 2+2 кўринишдаги йўлланмаларга ҳам эга чиқишимиз мумкин. Агар, "Пахтакор" жамоасини ОФКга тегишли ҳужжатларни тақдим этаётганлигини инобатга олсак, плей-оффдаги ўринларимиз сони биттадан кўп бўлишини тахмин қилиш қийин эмас.

Янги йилдан эътиборан, Қувайт, Иордания ва Баҳрайн жамоалари ҳам ОЧЛда тўғридан тўғри ёки плей-офф кўринишида йўлланмага эга бўлишга яқин турибди.