ОЧЛ-2021. Жейсон Уит: "Бизда ортиқча босим йўқ"

Унда "Юнайтед Сити" бош мураббийи Жейсон Уит ва футболчи Биенвенидо Маранон қатнашди. 

"Дастлабки ўйинни унутган ҳолда бор эътиборимизни эртанги учрашувга қаратганмиз. Фақат ижобий натижага умид қилмоқдамиз. Ўйин осон ўтмаслиги аниқ. Рақиб кучли жамоа, улар мағлубиятга учраган бўлсада ўзларидан яхши таассурот қолдирди. Биз кўтаринки руҳда тайёргарлик кўрдик",- дейди Жейсон Уит. 

"Жамоамга фойда келтиришни мақсад қилганман. ОФК кубоги билан ОЧЛ ўртасида фарқ катта. ОЧЛ нуфузли мусобақа. Ўзимизнинг энг яхши ўйинимизни кўрсатмоқчимиз",- дейди Биенвенидо Маранон.

- Тайёргарлик битта ўйинга қаратилганми ёки кейинги баҳсларни ҳам ўйлаяпсизми?

- Нафақат эртанги беллашув балки барча ўйинларга катта иштиёқ билан муносабатда бўламиз. Мусобақага ўзимизнинг халқаро тажрибамизни ошириб, имкониятларимизни кўрсатгани келганмиз. Турнирдаги барча ўйинлар фойдали бўлиши шубҳасиз. Олдинда ўйинлар кўп, ғалабалар қозона оламиз. Бунда мусобақаларла қийинчиликлар юзага келиши табиий. Футболчиларни ҳар томонлама тайёрлаш қийин. Ҳар қандай мураббий учун бу янги чақирув ҳисобланади. Масалан футболчи жароҳат олса уни қисқа вақтда кейинги баҳсга тайёрлашимизга тўғри келади. Биз ҳамма нарсага ижобий қараяпмиз. Бизда ортиқча босим йўқ. Ўйлайманки, ўзимизни ҳар томонлама кўрсата оламиз. 

- Пандемия, мусобақани марказлашган тарзда ўтиши, Австралия клубларининг келмагани ва Хитой жамоасининг ёшлар таркиби билан иштирок этаётгани ОЧЛга бўлган қизиқишни пасайганидан дарак берадими?

- Пандемия бутун дунёга ўзининг таъсирини ўтказиб келмоқда. Биз учун энг муҳими нуфузли турнирга ташриф буюрганимиз. Бундан мамнунмиз. ОЧЛда ўйнаш катта шараф. Хавфсизлик ва футболчиларнинг соғлиғи биринчи ўринда туради. Шу сабабли кўп жиҳатларни инобатга олиш керак. Марказлашган тарзда ўтказишдан бошқа чорамиз йўқ. Ҳозирги пайтда бу энг тўғриси. Австралия жамоаларига келадиган бўлсак, у ерда карантин қоидаларига жиддий қаралади. Уларнинг мазкур қарорга келишига вазият тақозо қилди. 

- ОЧЛнинг форматига қандай муносабат билдирасиз?

- Бу борада фикримни билдирсам, афсуски мусобақага узоқ вақт тайёргарлик кўра олмадик. Шундай бўлсада ОЧЛ бизга катта тажриба бўлади, дея оламан. Кўп нарса олиб янгиликлар билан қайтишимизни истайман.