Нозим Муллаохунов: "Бизга ғалаба кўпроқ зарур эди"

Нозим Муллаохунов ("УзДонгЖу" бош мураббийи): "Чемпионатни бошланишида муваффақиятли старт олган эдик. Шундан кейин икки асосий ўйинчиларимиз Бекзод Ғозиев ва Акмал Жўрабоевларнинг жароҳат олишлари шогирдларимга руҳий томондан салбий таъсир кўрсатди. Бундай ҳолатда футболчиларни яна қайтадан жипслаштира олиш мураккаб масала. "Цементчи" жуда яхши жамоа, яхши шаклланганлигини кўриб турибмиз. Улар ҳам бугун ғалабага эришишлари мумкин эди. Лекин бизга ғалаба кўпроқ зарур эди. Биз асосий ўйинчиларимизнинг сафга қайтишини кутаяпмиз. Биз ўз олдимизга қўйган мақсадларимизга қандай бўлмасин, хоҳ чиройли, хоҳ мазмунсиз ўйнаб бўлсада эришишга ҳаракат қилаяпмиз. Футбол ғалаба қозонишдан иборат. Бизда жуда кўплаб ёшлар бор. Улар доимо ўз устиларида ишлашда давом этишмоқда. Мен ҳар ўйинда ҳар хил таркибларни тушириб кўраяпман. Мақсадим ҳар бир ўйинчига кўпроқ ўйин амалиётини тақдим этиш. Футбол доимо мухлислар учун ўйналади. Мухлисларимизга кўрсатаётган ўйинимиз ёқаётган бўлса биз хурсандмиз.

 Фурсатдан фойдаланиб бугунги ўйин учун шогирдларимга катта рахмат айтаман. Бугунги ўйинда тактик жиҳатдан озгина камчиликларга йўл қўйдик. Кучли саккизталикка кириш учун тезлик билан ҳаракат қилмоқдамиз. Биринчи давра якунланди. Иккинчи даврага пухта тайёргарлик кўришимиз керак. Кейинги ўйинларда Ғозиев ва Жўрабоевлар қайтишини кутаяпмиз. Барчаси шифокорлар қарорига боғлиқ. Улар сафга қайтишса ўйинимизда ўзгаришлар бўлади"

Комилжон Икромов суҳбатлашди