Нўъмон Ҳасанов: "Локомотив" инқироз ҳолатида"

- Бугун чемпионатимизнинг энг кучли жамоаларидан бирига қарши майдонга тушдик. Ўзбекистоннинг амалдаги чемпиони "Локомотив"да яхши жамоа шаклланган, улар буни учрашув давомида исботлай олишди. Шуни билган ҳолда биз очиқ футболдан воз кечдик. Бир ҳафта давомида учрашувга қарши ҳужум услубида тайёргарлик кўрдик. Биз кўпроқ дам олдик, "Локомотив" эса чемпионлар лигасида қатнашди. Биз ҳам ютсак бўларди, "Локомотив" ҳам ғалаба қозонишга яқин келди. Ўз навбатида икки жамоа ҳам кўплаб хатоларга йўл қўйди. "Локомотив" айни дамда инқироз ҳолатига тушиб қолган, бир неча учрашувдан бери ғалаба қозона олишмаяпти. Шундай бўлса ҳам улар кучли жамоа эканлиги кўриниб турибди. Кейинги ўйинларда уларга омад тилайман.

Жамоамиз ҳам анчагина шаклланди. Биринчи бўлимда футболчиларим қўрқиб ўйнашди. Машғулотларда ишлаган каби ўйинларда ҳам шундай ҳаракат қилиш жуда қийин бўлмоқда. Шунинг учун ҳам танаффусда йигитларга қўрқмасликни айтдим. Қилинган ҳаракатлар зое кетмади, иккинчи бўлимда йигитлар қўрқмасдан ўйнашди. Жуда зўр ўйин намойиш этишди. Яна айтаман, очиқ футбол ўйнамадик. "Локомотив" билан бундай футбол ўйнаш жуда қийин. Уларнинг АГМК билан ўйинини кўрдим, бемалол 7-8та гол киритса бўларди. Уларнинг омади келмади. Жамоанинг кўплаб футболчиларини биламан, улар жуда кучли.

Ўткир Юсупов: "Қийин ўйин бўлишини билгандик. Шу боисдан жиддий тайёргарлик кўрдик. Мураббийнинг кўрсатмаларини яхши бажарган ҳолда дурангга эришдик"