Нўъмон Ҳасанов: "Эртанги ўйинда биз фаворитмиз, сабаби уйда ўйнаймиз"

“Эртага муҳим ўйин бўлиб ўтади. Гуруҳдан чиқиш вазифаси қўйилган. Бу ўйинда биз ғалаба учун курашамиз. Футболчилар баҳсга тўлиқ тайёрлар”, - дейди Нўъмон Ҳасанов.

“Эрон чемпионатида ўйнаганман. Клубларини жуда яхши биламан. Бу жамоага қарши ўйнаса бўлади. Олий лигани бошлаб олдик”, - дейди Ойбек Қиличев.



- Рақибни қанчалик ўргандинглар?
- Албатта, бу борада “Тракторсози”ни яхши ўргандик. Рақибнинг ўйинларини кўриб чиқдик. 6, 66, 10 ва 24-рақамдаги футболчилар хавфли экан. Табиийки улар ҳам бизни ўрганишган. Эрон футболи асосан курашга эътибор қаратилган.

- Даврон Ҳошимовнинг ўрнида кимни кўраяпсиз?
- Ҳозир айнан кимни тушишини айта олмайман. Кўз тегиб қолиши мумкин. Аммо ишонч билан айтаманки ўнг қанотда ўйнайдиган футболчини аниқлаб олдик.  Камолиддин Тожиевни синаб кўрдим, аммо эртага у бу жойда ҳаракат қилмайди.



- “Тракторсози” ҳақида қандай фикрдасиз?
Ойбек Қиличев: - Бу жамоага қарши “Пайкон” сафида ўйнаганман. Ўшанда ҳисоб очилмаганди. Эронда биринчи ўриндаги жамоа охирги ўриндаги жамоага ютқазиб қўйиши мумкин. Бундан ташқари футболчиларнинг кайфиятига ҳам боғлиқ.

- Эртага очиқ футбол намойиш этасизларми?
- Турли вариантларни ўйлаб қўйганмиз. Ҳужум қилишга ва гол уришга ҳаракат қиламиз. Асосий мақсадимиз гол ўтказмаслик. Бу тўқнашувда биз фаворитмиз, сабаби ўз уйимизда ўйнаймиз.

Нарзулла Сайдуллаев