Ном эмас, “нон” топишга кўмаклашинг!

Жамоадаги айни пайтдаги вазиятдан бироз бўлсада хабардор бўлганим учун сўровномани кўриб бир жаҳлим чиқди, бир кулгим келди.

Куни кеча “Андижон” футбол клуби раҳбарияти клуб логотипи ва жамоа тўп тепадиган стадион номини ўзгартирганлиги ҳақида ўқигандик. “Қовун қовундан ранг олади”, деганларидек, афтидан, “Насаф”нинг жонкуяр “раҳбарлари” шу йўл билан мухлисларни  жамоадаги муаммолардан чалғитишга уринишган шекилли. Умуман юртимиз футбол оламида қайсидир жамоа ёки ташкилотга янги раҳбар келиши билан ишни клуб логотипи ёки стадион номини ўзгартиришдан бошлаши янгилик эмас. Узоққа бормайлик, ЎФФ номи ЎФАга , “Бунёдкор” стадионини “Миллий” дея ўзгартирилгани (расмий ҳужжатларда ҳали ҳам “Бунёдкор” номи юритилмоқда) ҳали ёдимиздан кўтарилгани йўқ. 

Хўш, Қарши шаҳридаги “Марказий” стадион номини ўзгартириш кимга ва нима учун керак бўлди? Вазиятга ойдинлик киритиш мақсадида Қашқадарё вилоят ҳокимлиги матбуот хизмати раҳбари Аҳрор Содиқовга мурожаат қилганимизда “ҳозир ўз-ўзидан бирор ном танлаганда кўра, раҳбарият халқни ҳам тинглайлик дейишган” дея қисқа жавоб билан чекланди.

“Э қойил”, “бор эканку халқниям тинглайдиган раҳбарият” деворгим келдию, ҳурматли “ҳоким бува”нинг  “Насаф” молиявий муаммоларга қарамай, Суперлигани 2-ўринда тугатгани ва ўша пайтда жамоани табриклаб, “ҳар қандай қўллаб-қувватловга ва кўмакка тайёрман” деган гаплари ёдимга тушди. 1. Балки вилоят раҳбари стадиони номини ўзгартириш билан жамоани қўллаб-қўвватлашни мақсад қилгандир?! Балким?! Лекин клубдаги ҳозирги молиявий ҳолат – ишчи ходимларнинг бир неча ойлаб маош олмай ишлаб келаётганлиги, жамоанинг турли ташкилотлардан қарздорлиги бир неча юз миллионлардан иборат суммани ташкил этаётганини ҳам шунчаки эслатиб ўтмоқчиман. Шу ва шу каби муаммолар илдиз отиб кетган клубда ҳозирги шароитда стадион номини ўзгартириш (учун сўровнома ўтказиш)дан мен ҳеч қандай мантиқ топа олмадим. Сизчи?

Азиз НУРИЙ