"Навбаҳор"да собиқ мураббийлар масаласи ижобий ҳал этилди

“Навбаҳор” ПФК ҳамда россиялик мураббийлар - Алексей Беленков ва Андрей Канчельскис билан боғлиқ масала ижобий якун топди. Клуб ва унинг собиқ мураббийлари ҳар икки томонни қаноатлантирадиган келишувга эришишди. Томонлар бир-бирларига эътирозлари йўқлигини, ушбу масаланинг ҳуқуқий майдон тамойилларига асосланган ҳолда ҳал этилганидан мамнун эканликларини билдиришди.

Клуб томонидан “Навбаҳор” ПФКни ҳар томонлама қўллаб-қувватлаб турган, ҳамкорликка тайёрлигини билдириб, ёрдамини аямаган Ўзбекистон Футбол Ассоциацияси ҳамда Профессионал Футбол Лигаси раҳбариятига, клуб билан ҳамкорликда фаолият юритган “THEMIS LEGAL” спорт юридик фирмаси юристлари Хусанбаев Акмал ва Ливерко Ангелинага, улар билан алоқа ўрнатилишида беминнат ёрдам берган Championat.asia сайти раҳбари Ғайрат Хасбиуллинга, шунингдек, “Навбаҳор”нинг ўзбек футболи жамоатчилиги ҳамда жаҳон ҳамжамияти олдидаги обрўсини сақлаш йўлида кеча-ю кундуз тинимсиз меҳнат қилган “Навбаҳор” ПФК раҳбарияти, умуман, мазкур жараёнга алоқадор барчага миннатдорлик билдирилди.