"Навбаҳор" - "Нефтчи": Рамазондаги "водий дербиси"нинг нархи қанча?

"Навбаҳор" бунгача "Қизилқум" ва Самарқанднинг "Динамо" клубларини мағлуб этди. "Нефтчи" эса сафарда "Динамо"ни енгиб, ўз уйида "Қизилқум"га имкониятни бой берди. 

Аслида жамоаларнинг ўрни, таркиблар, уларнинг ҳолатидан қатъий назар "Водий дербиси" ҳамиша томошабинларга бой беллашув бўлиб келган. Аммо бу сафар-чи, бугун ҳам "Марказий" стадионида "аншлаг" кўрамизми? Бунга чипта нархи тўсқинлик қилиши мумкин экан... 

Маълумот учун Суперлига 1-тури доирасидаги "Навбаҳор" - "Насаф" ўйини учун чипта 50 минг сўм, 3-турдаги "Навбаҳор" - "Қўқон-1912" учрашувига эса - 30 минг қилиб белгиланганди. 

Биздаги маълумотларга қараганда, "Навбаҳор" - "Нефтчи" ўйини учун чипта нархи барча секторлар учун бир хил 30 минг сўмдан. Наманганлик мухлисларнинг кўпчилиги бу нархга рози эмас. Изоҳларда ишқибозлар бугун "Марказий" стадиони одатдагидек "ёнмаслигини", трибуналар тўлмаслигига Рамазон ойи эмас, айнан чипта нархи қимматлигини эҳтимолий сабаб сифатида келтиришган. Мисол сифатида келтирадиган бўлсак, алам билан гапирган мухлислардан бири "Сув ва хурмо ҳам берма майли, керакмас. Мухлисларни ўйлаб, чиптани нархини арзонроқ қилсанглар бўларди", деса, яна бир ҳамюртимиз "Мени бор умидим телевизоримдан" деб изоҳ қолдирган.   

Мухлислар айниқса клуб раҳбариятининг бундай қароридан норози. Уларнинг фикрича, 30 минг сўмдан икки-уч минг мухлис стадионга келганидан кўра, 15 мингга чипта олиб, 10 минг ишқибоз киргани мухлисларга ҳам, клубга ҳам яхшироқ бўларди. 

Афтидан клуб раҳбарияти ўз мухлисларига қаттиқ ишонади чоғи. Бироқ бугун "Марказий" одам билан тўладими, деган савол ҳозирча очиқлигича қолмоқда. 

P.S.: Биз бу борада бирор томоннинг ёнини олмоқчи эмасмиз. "Championat.asia" шунчаки вазиятга, мухлислар фикрига эътибор қаратди. Илтимос, фикр билдиришда ўзингизни, бошқаларни ҳурмат қилинг ва айниқса Рамазон ойи эканлигини унутманг. Аввалдан раҳмат.