"Навбаҳор": Михайлов ортга қайтди

Айни пайтда кунига икки маҳалдан шуғулланаётган футболчилар 27 февраль куни биринчи лига вакили “Оқ-тепа” жамоаси билан назорат ўйинида куч синашишади. Бу пойтахтда ўтказилаётган сўнгги йиғиндаги иккинчи учрашув бўлади. Ёдингизда бўлса олдинги назорат ўйинида мамлакат ёшлар терма жамоаси билан ўтиб, унда 2:1 ҳисобидаги ғалаба қўлга киритилганди.

Жамоада рўй берган янгиликлар хусусида гап кетганида Болгариядан таклиф этилган посбон Эмил Михайловни ўз юртига қайтиб кетганлигини айтиб ўтиш жоиз. Аслини олганда Михайлов билан шартнома тузиш кўзда тутилганди. Лекин, Европача яшаш тарзига кўникканлиги боис биздаги шароитлар тўғри келмаганлиги сабабли, дарвозабон ортга қайтишни лозим топди. Айни пайтда мураббийлар штаби таркибга маҳоратли дарвозабон жалб этиш борасида иш олиб боришмоқда.

Тошкентдаги йиғин эса 1 март куни якунланадиган бўлди. Айнан шу куни Жиззахнинг “Сўғдиёна” жамоасига қарши назорат ўйинини ўтказиш режалаштирилган. Жамоа аъзолари бир неча кун ҳордиқ чиқаришгач, мавсумга тайёргарликнинг сўнгги босқичини ўташ мақсадида 4 март куни Наманганда тўпланишади.