"Навбаҳор": “Бунёдкор” ёшлари билан дуранг қайд этилди

“Бунёдкор” ўйингоҳининг сунъий қопламали майдонида ўтказилган баҳсда мураббийларимиз олдинги учрашувларда майдонга тушмаган ва кам ўйин амалиётига эга бўлган футболчилар хизматидан фойдаланишди. Учрашувнинг биринчи бўлимида ёш “қалдирғочлар” ҳисобни очишга эришишганди.

Тез орада Сербиядан таклиф этилган ҳужумчи Александар Лепосавич ўртадаги мувозанатни тиклади. Танаффусдан кейин ҳам футболчиларимиз устунликка эришиб, рақиб дарвозаси қаршисида кўплаб вазиятларга эга бўлишди. Лекин, Отабек Валижонов (2 марта) ва Юрий Рижколар имкониятлардан фойдалана олишмади. Учрашув охирларида “Бунёдкор” ёшлари пенальтини аниқ амалга ошириб, олдинга чиқиб олишганди. Тез орада Аъзам Алиев жавоб тўпини киритиб, баҳсни 2:2 ҳисобидаги дуранг билан якунланишини таъминлади. 

Жамоамиз учрашувни қуйидаги таркибда майдонга тушди: Достон Тўхтабоев, Тоҳир Шамсиддинов, Омон-Биик Ҳалилов, Юрий Рижко, Ботир Тўрабоев, Отабек Валижонов, Ғайрат Жўраев, Алишер Маҳмудов, Александар Лепосавич, Муҳаммад Расулов, Азиз Турғунбоев.
Захирадан майдонга тушганлар: Хуршид Хўжаев, Аъзам Алиев, Илҳом Бойдедаев, Роббим Ҳасанов.

Таркиб хусусида гап кетганида, ўтган мавсумни Ғузорнинг “Шўртан” клубида ўтказган ҳимоячи Қаҳрамон Маҳаммаджонов мавсум якунига етгач жамоа ихтиёрига қайтганди. Маълум вақт давомида машғулотларда қатнашган ҳимоячи “Қўқон-1912” жамоасига ижарага берилди. Айни пайтда жамоамиз марказий ҳимоясида жиддий рақобат юзага келганлиги учун мураббийлар шундай қарорга келишди.