“Насаф” янги мавсум тайёргарлигини Драган Черансиз давом эттирмоқда

Машғулотлар клуб қароргоҳида бўлиб ўтмоқда. Машғулотларда Дониёржон Нарзуллаев, Азизжон Ғаниев, Шароф Муҳитдинов, Бобир Абдухолиқов ва Одилжон Ҳамробеков иштирок этишмаяпти. Ўзингизга маълум, ушбу футболчилар 2018 йил 21 январгача U-23 терма жамоамиз ихтиёрида бўлишади.

Сербиялик легионер ҳужумчи Драган Черан 20 декабрдан машғулотларга қўшилади. Яна бир легионер Игорь Голбан эса машғулотларга 15 декабрдан киришган.

“Насаф” 22 декабрь куни U-23 терма жамоамиз билан ўртоқлик учрашуви ўтказади. Ушбу учрашув, шу куни Қарши шаҳридаги “Марказий” стадионда соат 15:00да бошланади.

Жамоанинг декабрь ойидаги режасига кўра, 26 декабрь куни футболчиларимиз тайёрлиги бўйича норматив топширишади ва шу куни тантанали тақдирлаш маросимида ҳам иштирок этишади. Декабрь ойи тайёргарлик машғулотлари 28 декабрь куни ниҳоясига етади. Шу куни жамоамиз яна бир назорат учрашувида майдонга тушиши мумкин. Шундан сўнг футболчиларимиз янги йил байрами муносабати билан қисқа таътилга чиқишади.

Мухлисларни кўпроқ қизиқтирадиган таркибдаги ўзгаришлар ҳақида ҳозирча янгилик йўқ.