"Насаф" лагеридан дараклар

Бу ҳақда клуб матбуот хизмати хабар қилди.

"Насаф" клуби қароргоҳида таъмирлаш ишлари олиб борилаётгани ва жамоанинг аксарият футболчилари миллий ҳамда олимпия терма жамоаларига жалб этилгани боис дастлабки йиғин январга қолдирилди.

Айни пайтда жамоани расман бир нафар футболчи тарк этган. Бу "Насаф"нинг кўп йиллик фидоий футболчиси Мақсуд Каримов. Ўтган мавсум сўнггида футболчилик фаолиятини якунлаганини эълон қилган ҳимоячидан бошқа ҳеч ким клубни расман тарк этгани йўқ.

Куни кеча жамоа ҳимоячи Умар Эшмуродов билан ўртадаги битимни узайтиришга муваффақ бўлган. Бу ҳақда клуб матбуот хизмати хабар қилганди.

Жамоанинг келгуси режалари ва мақсадларини раҳбарият томонидан янги йилда ҳал этилади. Ҳозирча мураббийлар штабидаги мутахассислар, хусусан жамоа устози Рўзиқул Бердиевнинг клуб билан тузган шартномалари тугаган.

Катта эҳтимол билан ўртадаги битим янги йилда яна узайтирилади. Рўзиқул Бердиев "Насаф"да қолишга қарши эмас. Кўп нарса жамоанинг келаси мавсумдаги мақсад ва вазифаларига боғлиқ. Клуб бир неча нафар иқтидорли ва етакчи футболчиларига келаётган таклифларни кўриб чиқадими ёки футболчилари жамоада сақлаб қоладими, бу ҳам янги йилда ҳал этилиши кутилмоқда.

Эслатиб ўтамиз, "Насаф" жамоаси 3 январдан эътиборан клубнинг Қаршидаги қароргоҳида йиғилади ва  тайёргарликни бошлайди. Февраль ойида эса жамоа Туркияда ўқув-йиғин машғулотларини ўтказиши режалаштирилган.