«Насаф» футбол мактабидаги сунъий майдонга эътибор қаратиш вақти келди

«Насаф» футбол мактабига 2009 йилда асос солинган. Бу даргоҳдан ҳозиргача кўплаб чарм тўп усталари етишиб чиққан ва бу жараён давом этмоқда.

Сўнгги йилларда «Насаф» футбол клубининг эришган ютуқларида ҳам футбол мактабининг ўз ўрни бор. Ҳозир кунда жамоанинг ўзагини ҳам айнан ушбу даргоҳ битирувчилари ташкил этади. Бундан ташқари «Насаф» футбол мактаби турли ёшдаги терма жамоаларга футболчиларни етказиб бермоқда.

Ўз вақтида «Насаф» футбол мактабида футбол сир-асрорларни ўрганган Азизжон Ғаниев, Одил Хамробеков, Ислом Кенжабоев, Ислом Рашидхонов, Бобир Абдихолиқовлар ҳозирда Ўзбекистон ва БАА ва Беларусь клубларида тўп тепишмоқда.

Юқорида келтириб ўтган ютуқларимиз бу ўз вақтида «Насаф» футбол клубида болалар футболига алоҳида эътибор берилгани самарасидир.

Аммо вақт барча нарсага ўз ҳукмини ўтказади. Янги қурилган иморатлар ҳам вақт ўтиб эскира бошлайди. Ҳозирги кунда «Насаф» футбол мактаби сунъий майдони ҳам ўз хизмат вазифасини ўтаб бўлган. Сўнгги ўн йилликда кўплаб футболчиларни етказиб беришда хизмат қилган майдоннинг ҳозирги ҳолатини яхши ҳолатда деб бўлмайди. Тўғри футбол мактабда яна иккита табиий майдон ҳам мавжуд лекин қиш мавсумида табиий майдонларда шуғулланиб бўлмайди. Тарбияланувчилар эса гуруҳларга бўлиниб ҳар куни сунъий майдонда шуғулланишларига тўғри келади.

«Насаф» футбол мактабидаги сунъий майдон 2009 йилда барпо этилганини инобатга олсак, у ўз вазифасини аъло даражада ўтаб бўлди. Агар биз келаси ўн йилликда янги юлдузларни кашф этишни хоҳласак футбол мактабининг моддий техник базасини тубдан янгилашимиз зарур ва бу албатта ўз мевасини беради.

Биз «Насаф» футбол клуби танқид қилишдан йироқмиз. «Насаф» жамоаси ёшлар билан ишлашда етакчилардан бири ҳисобланади ва бу борада клубда ишлар яхши йўлга қўйилган. Аммо футбол жадаллик билан ривожланиб бормоқда. Бу майдонларда Ўзбекистоннинг, «Насаф»нинг келажаги бўлган болажонлар шуғулланишмоқда.

Биз мутасаддилардан шу жиҳатга ҳам алоҳида эътибор беришларини сўраб қоламиз.

Қуйида футбол мактабидаги сунъий майдоннинг аввалги ва ҳозирги ҳолатини акс этган фотоларни кўришингиз мумкин:

Нарзулла Сайдуллаев