Муҳсин Низомиддинов: "Давралар оралиғида баъзи нарсаларни ўзгартирамиз ва керакли натижаларга эришишга ҳаракат қиламиз"

Ассалому алайкум, барчага. Ўйини барча кўрди, учрашувнинг дастлабки дақиқаларидан ҳужум қилдик, етарли даражада вазиятлар яратдик, афсуски бизга сўнгги учрашувларда омад етишмаяпти. «Дўстлик»ка қарши учрашувдан сўнг бир ҳафта давомида яхши тайёргарлик кўрдик, футболчиларга керакли вазифаларни бердик, бироқ бугун ҳам нимадир етишмади. Ҳужум қилиб туриб, ўзимизнинг хатоларимиз эвазига голлар ўтказиб юбормоқдамиз.

Футболчилар ҳам максимал даражада ўйнашга интилишмоқда, бироқ уларнинг даражаси ҳам шу экан. Биз мавсум бошида ёшлар билан ишлашни мақсад қилгандик, уларга имкон бердик, аммо улар кўп ҳолларда бу имкониятлардан фойдалана олишмади. Давралар оралиғида баъзи нарсаларни ўзгартирамиз ва керакли натижаларга эришишга ҳаракат қиламиз.

Давралар оралиғида таркибни кучайтириш бўйича ишлар олиб борамиз. Бу вазиятдан чиқиб кетиш учун максимал даражада ҳаракат қиламиз.

Мақсадимиз ўзгармаган — биз суперлига учун курашни давом эттирамиз.