Мозий чемпионлари

Қуйида уларнинг баъзилари билан танишиб чиқамиз

"Депортиво"

Ушбу клуб ўтган асрда Испаниянинг юқори дивизионида яхшигина обрўга эга эди. Ла-Корунья жамоаси 1999/2000 йилги мавсумда Ла Лига чемпионлигини кўлга киритган бўлса, 2 марта Испания Кубоги ва 3 марта Испания Суперкубогига эга чиққан. Ўша пайтларда "Депор" нафақат Испания, балки Европада ҳам ўз мавқеига эга эди. 

Клубнинг УEФА Чемпионлар Лигасидаги энг яхши натижаси – ярим финал босқичи. Шундан сўнг жамоада пасайиш кузатилиб, Испания миллий чемпионатида пастки ўринларни эгаллай бошлади. Раҳбарият ўзгариши ва бошқа факторлар Ла-Корунья клубини 2015 йилда Сегундага тушиб кетишига олиб келди. 

2021/22 йилги мавсумни жамоа учинчи даражали лига – Испания қироллик футбол федерациясининг биринчи дивизионида ўтказмоқда. 

"Ньюкасл"

Ньюкасл шаҳри жамоасида АПЛнинг бошқа йирик клубларидек шонли тарих бор. Ушбу клуб ўтган аср охири ҳамда янги аср бошида йирик натижалар қайд этган. Клубда 4 та АПЛ чемпионлиги кубоги, 6 та Англия Кубоги ва шу каби бошқа йирик совринлар мавжуд. 

"Ньюкасл"да АПЛ тарихида ўз номини ўчмас қилиб қолдирган Алан Ширер каби футбол афсоналари тўп тепган.

Молиявий инқироз туфайли 2015 йилда Чемпионшипга тушиб кетиб, бир йилдан сўнг қайтди ва ҳозирги кунгача клуб кўзга кўринарли натижалар қайд этмади. 

2021 йилда жамоага янги хўжайинлар келгач, яна йирик натижалар кутила бошланди. Балки клуб яна эски даврларига қайтиб, йирик натижалар қайт эта олар. Кўрамиз, кузатамиз.

"Лидс Юнайтед"

АПЛ тарихида инқирозга юз тутган яна бир катта клублардан бири – бу "Лидс Юнайтед". Ушбу клуб узоқ йиллар мобайнида Чемпионшипда жон сақлаб келди ва 2020 йилда АПЛга қайтди. 

Умумий совринларига келсак, 3 марта Премьер-лига ғолибига айланган. Шунингдек, 1 та Англия Кубоги, 1 та Англия Лига Кубоги, 2 та Англия Суперкубоги соҳиби бўлган.

Клуб молиявий инқироз туфайли мавқеини йўқотганди. 2018 йилги мавсумда жамоага Марсело Бьелса мураббий этиб тайинланди. Тажрибали мураббий қўл остига истеъдодли футболчиларни жамлади ҳамда АПЛга қайсидир маънода "буюк қайтиш" қилди.

"Шальке-04"

Яқин йилларгача Бундеслига кучлилари орасида санаб ўтилган клуб айни пайтда Германиянинг Иккинчи дивизионида ўйнаяпти. "Шальке" ўтган йили Бундеслига билан хайрлашди. 

Гельзенкирхен клуби совринлар борасида ҳам мақтанарли натижалар кўрсатган (7 карра Бундеслига чемпиони, 5 марта Германия Кубоги эгаси, 1 марта Европа Лигаси ғолиби ва бошқалар). 

Ўз пайтида жамоада Рауль Гонсалес, Мануэль Нойер, Месут Ўзил, Лерой Сане каби футбол юлдузлари тўп тепишган. Таркибининг кучсизланиши туфайли клуб Иккинчи дивизонга равона бўлди.

"Ноттингем Форест"

Англиядаги яна бир олтин тарихли клуб!  "Ноттингем Форест" жамоасида юқоридагиларда мавжуд бўлмаган нарса бор, яъни клубда 2 та Европа Чемпионлари Кубоги (ҳозирги Чемпионлар Лигаси Кубоги) мавжуд. Аммо бу жуда узоқ йил аввал юз берган эди (1978/79 ва 1979/80 йилги мавсумда). Шунингдек, Уэст-Брижфорд клуби 1 марта АПЛ чемпионига ҳам айланган.

Афсуски, жамоа янги аср аввалида ўз мавқеини деярли буткул йўқотди. Клуб 2003/2004 йилги мавсумда Чемпионшипга чиқишни уддалади ва ҳозирги пайтда иккинчи даражали лигадаги иштирокини давом эттирмоқда.

Шуҳрат Ҳомидов тайёрлади