Мирко Еличич: "Мен ишлаган "Локомотив" билан ҳозиргисининг фарқи жуда катта"

- Ўйин яхши ўтди. Биз кўп вазиятга эга бўлмадик. Рақиблар яхши ҳаракат қилишди. Иккинчи бўлимда ўйинни ўзгартиришга, босимдан чиқишга, олдинга ўтишга ҳаракат қилдик. Бироқ тўпни кўп ҳам назорат қила олмадик. Албатта, бундай ҳолатда тўп учун кўпроқ курашиш керак бўлади. Узун паслар учун бизда бўйи узун футболчилар етишмаяпти. Бизга бу жиҳат оғир таъсир қилмоқда. 

- Иккинчи ўтказиб юборилган голда дарвозабон қўпол хато қилди. Бироқ у бугунги ўйинни юқори даражада ўтказди. Бундай қўпол хатонинг сабаби нимада деб ўйлайсиз: тажрибами ёки чарчоқ?

- Тўғрисини айтсам, голни кўрмай қолдим. Футболчини захирадан туширишга тайёрлаётгандим. Албатта, у ҳали ёш. Тажриба кам, баъзида эътиборни йўқотиб қўяди. Исталган дарвозабон ҳам оддий зарбалардан кейин гол ўтказиб юбориши мумкин. Бунинг учун ҳам ўрганишда давом этиш керак. Футболни микросониялар ҳал қилади. Бир микросонияга эътиборни йўқотсанг, жазоланасан. 

- "Олимпик" Сиз истаган футболни намойиш қиляптими? 

- Йигитлар биз қандай футбол ўйнашимиз кераклигини анча тушуниб қолишди. Энг асосийси улар майдондаги персонал ролларини, жамоага берилаётган вазифаларни билиб олишди. Тушунарлики, ҳар бир ўйинга турли хил вазифалар қўйилмоқда. Ҳар бир футболчи бошқача ўйин намойиш қилмоқда. Уларга ўз ўйинларини қандай ўзгартириш кераклигини тушунтиряпмиз. Биз эндигина биргаликдаги тўртинчи ойни ўтказяпмиз. Тўрт ой ичида бунча ишларни қилиш осон эмас. Ўзбек футболига бир жиҳат етишмайди: ёш футболчилар ўз даражаларини ва сифатини яхши билишмайди.

- Сиз "Локомотив"да ишлагансиз ва бу клуб ҳақида яхши биласиз. "Локомотив"нинг ҳозирги жамоаси ҳақида нима дея оласиз?

- Бу умуман бошқа жамоа. Мен ишлаган пайтда жамоа бошқа эди. Мураббийлар бошқача футболчиларни изламоқда, бошқача услубни кўзламоқда. Бу бутунлай бошқача жамоа. Энди барчаси мураббийлар штабига боғлиқ. Улар нима ёқаётган бўлса, шуни қилишлари керак.