Миржалол Қосимов "Сурхон"га қарши ўйиндан сўнг: "Машғулот бошқа - майдонда расмий ўйин ўтказиш бошқа"

"Ўйин ҳақиқатдан ҳам осон бўлмади. "Сурхон" яхши шаклланган жамоа, у ерда малакали ўйинчилар йиғилган. Жамоа ўз уйида "Машъал"ни юта олмаганидан кейин бизга қарши ўйинда қарши ҳужумда ўйнади. Қолаверса уларда яхши ҳужумчи бор - Касьян. 

Рақиб асосан ҳимояда ўйнади, биз биринчи бўлимда ёриб киришда қийиналдик. Иккинчи бўлимда ўзимизда куч топдик ва тезроқ ҳаракатландик, ўйинга динамика қўшдик, вазиятлар пайдо бўлди. "Сурхон" иккинчи бўлимда ҳам қарши ҳужумда яхши ҳаракатланди.

Вазиятлардан фойдаланиш? Бекободдаги ўйиннинг биринчи 20 дақиқасини яхши бошлагандик. Ютиб турганимизда вазиятлардан фойдалана олмай, қарши ҳужумда гол ўтказиб юборгандик.

Кўриниб турибди, барчага вақт керак. 3 ой дам олиш ҳазил эмас. Машғулот бошқа - майдонда расмий ўйин ўтказиш бошқа. Қолаверса икки футболчимизда жароҳат бор эди, шу сабабли иштирок эта олишмади, энди ротация қиламиз.

Вацадзе жароҳатдан сўнг тиклана олмадими? Ҳа, айтганимдек унинг жароҳати бор. Барчасига ўйинлар ўтказилмагани сабаб бўлмоқда", - деди Миржалол Қосимов.