Миржалол Қосимов: "Биринчи таймда оддий вазиятдаги хато бизга қимматга тушди"

- Ўйин ҳақида фикрингиз?

- Ажойиб ўйин гувоҳи бўлдик. Стадиондаги муҳит, мухлислик даражаси ҳам юқори бўлди. Майдон сифатидан тортиб чиройли футбол ўйнаш учун ҳамма шароит қилинган. Йигитларимиз ҳаракат қилди. Биринчи таймда оддий вазиятдаги хато бизга қимматга тушди. Ўйлайманки, стадионга келган мухлислар чиройли футбол кўришди. Ҳакамнинг то охирги ҳуштаги чалинмагунча яхши ўйин кетди. Ҳаёт давом этади. Афсуски, бу йил бир текис ўйин кўрсата олмадик. Энди кейинги баҳсга тайёргарлик кўрамиз. "Нефтчи"ни эса ютуқ билан табриклайман.

- Бугунги ўйинни 15 мингдан зиёд мухлис стадионда кузатиб борди. Ўйиндаги муҳит ҳақида фикрларингиз билан ўртоқлашсангиз?

- Мен ҳозир нимани гапирдим? Айтдим-ку, муҳит зўр бўлди. Мухлисларга миннатдорчилик билдирдим. Буларни бошқа тилда гапирдим шекилли. Бир-бирига муносиб икки жамоа ҳаракат қилди. Футбол ўзи мухлислар учун ўйналади. Бир хил пайт ўзбекча гапирса яна ўзбек тилига таржима қилишади-ю, ҳозир шунақа кўриняпти. 

- Биринчи даврада дарвозабонлар муаммоси мавжуд эди. Иккинчи даврада бу муаммо бартараф этилдими?

- Йўқ. Бу муаммо ҳамон давом этмоқда. "Қўқон-1912" билан ўйинда ҳам шу муаммо кўзга ташланганди. Йил давомида 3-4 нафар дарвозабонни майдонга туширишга мажбур бўлдик. Бу ҳам футболнинг бир қисми экан. Бугунги ўйинни дарвозабонимиз ёмон ўтказмади, лекин умумий олиб қарганда хатолар кўп бўлди. Ўйлашимча, 10-12 очкони шунинг учун бой бердик. Агар қўшимча 9 очкомиз бўганида ҳозир биз ҳам етакчилар қаторида кураш олиб бораётган бўлардик.

- ОКМК кейинги баҳсни "Насаф"га қарши ўтказади. Шу баҳсда сиз айтаётган муаммолар ёпиладими? Чунки бу ўйин натижаси "Нефтчи" учун ҳам қизиқ.

- Биз "Нефтчи"га қарши қандай майдонга чиққан бўлсак, "Насаф" билан ҳам шундай темпда ўйнашга ҳаракат қиламиз. Чемпионатда 15та клубга қарши иккитадан ўйин ўтказишга тўғри келади ва бу ўринда биз учун рақиб ким бўлишининг фарқи йўқ. Авваламбор ўз мухлисларимиз учун ҳаракат қиламиз.

- Рус нашрлари Фабио Каннаваро миллий терма жамоамизга бош мураббий бўлгани ҳақида мақола ёзиб, ҳайрон қолишганини баён этишди ва керак бўлса Сизни Каннавародан устун қўйишди.

- Тўғриси, рус матбуотини кузатганим йўқ. Футболимиз раҳбарияти Каннаварога ишониб терма жамоани топдирди ва шу билан гап тамом. Ҳозирги вазиятда ҳамма мутахассис, бекорга айтишмайди-ку тилнинг суяги йўқ деб. Янги мураббийга менимча Жаҳон чемпионатидан кейин баҳо берган маъқул. Четдан ҳамма истаганини гапириши мумкин, лекин бош мураббий ўрнида бўлиб қарор қабул қилиш осон эмас.