“Металлург” Жиззах сари йўл олди

Мазкур учрашув учбу жамоаларнинг ўзаро 30-ўйини бўлади. Ортда қолган 29 та ўйиннинг 11 тасида бекободликлар, 12 тасида эса жиззахликлар зафар қучишган. 6 та ўйинда эса кучлар тенг келган. Киритилган ва ўтказиб юборилган голлар фарқи 44:40, “Сўғдиёна” фойдасига.

Жамоаларнинг шу йил биринчи даврада Бекободда ўтган учрашувида мезбонлар 2:1 ҳисобида зафар қучганди. “Металлург” тўпурари Зоҳид Абдуллаевнинг икки голига Фаррух Шотурсунов битта аниқ зарбаси билан жавоб қайтарганди. Иккинчи даврада жавоб голи муаллифи энди собиқ жамоасига қарши майдонга тушади. Шотурсунов бекободликлар таркибида “Бунёдкор”га қарши Ўзбекистон кубогининг чорак финал, дастлабки ўйинида дебютини ўтказди ва бекободликларнинг голида ассистентлик қилди. Жиззах сафарига “Металлург” ўзининг оптимал таркибида йўл олди. барча футболчилар саломат, жароҳат олганлар ҳам сафга қайтишди. Сафар олдидан “Металлург” ҳимоячиси Ислом Қобилов Ўзбекистон U-19 жамоасида Тошкентда бўлиб ўтадиган халқаро турнирда қатнашиш учун таклифнома олганлигини ҳам айтиб ўтмоқчимиз.

Жамоаларнинг навбатдаги учрашувини тажрибали ҳакам Ҳасан Рўзиев бошқариб боради. Унга қанотларда Олимжон Абдувосилов ҳамда Санжар Шоюсуповлар ёрдам беришади. Заҳирадаги ҳакам Комилжон Расулов эса бугун ёшлар таркиблари ўйинида бош ҳакам вазифасида ишлайди. Ҳасан Рўзиев бу йилги мавсум ҳисобидан “Металлург” иштирокидаги биринчи ўйинда ишласа, жиззахликларнинг Наманганда “Навбаҳор”га қарши сафар ўйинида фаолият юритган. Ўша учрашувда ҳисоб очилмаганди – 0:0.


«Сўғдиёна» (Жиззах) – «Металлург» (Бекобод)
Ҳакамлар: Ҳ. Рўзиев (Тошкент), О. Абдувосилов (Тошкент), С. Шоюсупов (Тошкент), К. Расулов (Қарши)
Назоратчи: Р. Айтеков (Тошкент).
ЎзПФЛ вакили: В. Леткин.

"Металлург" матбуот хизмати