“Металлург”: Биринчи йиғин якунланяпти

Мураббийлар штаби ўтган йилги асосий таркиб ҳамда ёшлар таркиби ўйинчилари билан аввалиги бир маҳалдан, йиғин охирига келганда икки мартадан жисмоний тайёргарликни тиклаш машқларига катта эътибор қаратишди. 30 декабрь куни тушликдан кейин футболчиларга Янги йил байрами таътили берилади. Таътил 4 январга қадар давом этади.

Иккинчи йиғинни ҳам бекободликлар Чирчиқ шаҳрида бошлашади. Бу йиғинда кўрик-назорат учрашувларига катта ўрин ажратилади. Дастлабки назорат ўйини январь ойининг биринчи ўн кунлигида “Қўқон 1912” жамоасига қарши ўтказилишига келишиб олинди. Биринчи йиғин давомида жамоанинг ўтган йилги асосий таркиби сақлаб қолинганлиги маълум бўлди. Фақатгина ўтган мавсум “Бунёдкор”дан ижара асосида “Металлург”га келиб тўп сурган футболчилар пойтахтликлар ихтиёрига қайтиб кетишди. Уларнинг тошкентликлар сафида қолиш-қолмаслиги иккинчи йиғингача аниқланади. Шунингдек, 2016 йилги мавсум иккинчи ярмидан “Металлург”да фаолият олиб борган Шерзод Жалилов ҳамда Фаррух Шотурсуновлар бошқа жамоаларда янги мавсумга тайёргарлик кўришяпти. Иқтидорли ярим ҳимоячиларимиздан яна бири – Жаҳонгир Абдумўминов эса Таиланд жамоаларидан бирида кўрикдан ўтмоқда. Ўз навбатида “Металлург” мураббийлари ҳам жамоани кучайтириш мақсадида бир қатор тажрибали ўйинчиларни кўз остларига олишган. Бу борадаги янгиликлар ҳақида ҳам иккинчи йиғин пайтида маълумот берамиз.

"Металлург" клуби матбуот хизмати