Месси ёки Роналдуни ким алмаштиради?

Аммо бу - ҳаёт тўхтаб қолади, дегани эмас. Кунлар келади, уларнинг ўрнини қайсидир ёш иқтидорлар эгаллайди. Савол туғилади: хўш, бу ёшлар кимлар ўзи?! Soccer.ru худди шу савол устида изланиб, маҳоратли ёш футболчилардан ўзига хос рамзий терма жамоа тузиб чиқди.

Дарвозабон

Жанлуижи Доннарумма («Милан»)

Ёши: 17да

Юлдуз прототипи: Жанлуижи Буффон

Табиийки, «Кичик Жижи»ни «Милан»да осон бўлмаган жуда кўплаб ўйинлар кутиб турибди. Аммо ҳатто Оливер Кан ҳам буюк фаолия­тининг аввалида бир ўйинда бештадан гол ўтказиб юборган. Шунга қарамай, у футбол тарихида ўзидан сезиларли из қолдиришга эришди. Демак, Жанлуижи Доннаруммада ҳам худди шундай имконият бор. Зеро, у жуда ёшлигиданоқ Италия терма жамоасига жалб қилиб келинмоқда ва бу орқали Буффоннинг ёшлигидаги бир қанча рекордларини янгилашга улгурди. Қолаверса, у йилдан-йилга улғайиб, кучайиб бормоқда. Жумладан, Доннарумма охирги уч ўйиндан бери дарвозасини «қуруқ» сақламоқда. Шунингдек, ёш кипер омадли ҳам: «Фиорентина»га қарши ўйиндаги пенальтида дарвоза устуни Жанлуижининг жонига оро кирди.

 

Ҳимоячилар

Эктор Бельерин («Арсенал»)

Ёши: 21да

Юлдуз прототипи: Кафу

Собиқ жаҳон чемпиони, футбол афсоналаридан бири бўлган Кафунинг айтишича, Бельериннинг ҳаракатлари унга ўз ёшлигини эслатар экан. Агар АПЛнинг ўтган мавсумдаги кўрсаткичларини ҳисоб-китоб қилиб чиқсангиз, голли узатмалар сони бўйича ҳеч ким Эктордек яхши натижага эришмаганини билиб оласиз. Демак, Белье­ринни испан футболи ва «Арсенал»нинг келажаги деб бемалол айта оламиз. Фақат шуниси ҳам борки, «канонирлар» ундан янада кўпроқ фойда олишни исташса, Экторни «Барселона» ва «Реал» назаридан эҳтиёт қилишлари керак бўлади. Хуллас, у ажойиб ҳимоячи!

 

Андреас Кристенсен

(«Боруссия» М.)

Ёши: 20да

Юлдуз прототипи: Жон Терри

Одатда, Германияда Андреаснинг ҳаракатларини Беккенбауэрнинг ёшлигига қиёслашади. Бироқ унинг Жон Террига ўхшаш жиҳатлари ҳам талайгина. Очиғини айтиш керак, ҳозирча Кристенсен «Манчестер Сити» ёки «Барселона» каби гранд жамоаларга қарши баҳсларда унчалик ўзини кўрсата олмаяпти. Бироқ бундеслига ўйин­ларида иқтидорли ҳимоячи бутунлай ўзгариб, ўзига тўла ишонч билан ҳаракат қилади. Қисқаси, талабалик ёшидаги энг кучли, умидли ҳимоячилардан бири сифатида айнан Андреасни кўрсатсак, бўлаверади.

Преснел Кимпембе («ПСЖ»)

Ёши: 21да

Юлдуз прототипи: Же-ром Боатенг

Аслини олганда, Франциянинг қуйи дивизионларидан ўсиб, Лига 1 ва «ПСЖ» даражасига чиқиш - осон иш эмас. Аммо Преснел худди шуни уддалай олган қатъиятли ёшлардан бири. Ажойиб кунларнинг бирида Франция терма жамоасининг собиқ юлдузи Марсель Десайи «Монако»нинг ғалаба голини жонли эфирда ёзиб олиб, кейин хандон отиб кулди. Яқин келажакда Кимпембе ҳам ТВда таҳлилчи сифатида иш бошлаб, шундай роликларни суратга олиши мумкин. Лекин ҳозирча у мавсумни Маркиньос билан «ПСЖ»нинг асосий таркибида бошлаб, барчанинг эътиборини ўзига қаратмоқда. Айниқса, унинг «тоза подкат»лари ва тўпни рақибдан моҳирлик билан олиб қўйиши алоҳида таҳсинга лойиқ.

 

Жошуа Киммих («Бавария»)

Ёши: 21да

Юлдуз прототипи: Филипп Лам

Киммих шу даражада универсал ҳимоячики, уни ҳар қандай позицияга қўрқмай жойлаштириш мумкин. Бизга эса у чап қанот ҳимояси учун керак. Яқиндан бошлаб эса Киммих «Рэшфорд вируси»ни юқтириб олди. Яъни, бирдан гол уришга киришиб кетди. Табиийки, футболчининг «гол ҳиди»ни сезиш қобилияти Анчелоттининг назаридан четда қолмади ва у ўз шогирдини нисбатан олдинроқда синаб кўряпти. Мисол учун, Жошуа бундеслиганинг «Гамбург»га қарши ўйинида «Бавария»ни деярли бир ўзи елкасида тортди. Риберининг ажо-йиб узатмасини ҳам ҳавога совурмади.

 

Ярим ҳимоячилар

Раҳим Стерлинг

(«Манчестер Сити»)

Ёши: 21да

Юлдуз прототипи: Кларенс Зеедорф

Иқтидорли ёш ярим ҳимоячилар Дортмунднинг «Боруссия»сида жуда кўп -  Мор, Дембеле, Пулишич... Шунингдек, «Атлетико»да тўп сураётган Ньигес ҳам бор. Бироқ биз рамзий терма жамоадаги ўринни Раҳим Стерлингга ажратдик. Майдондаги ҳаракатлари билан Стерлинг кўпроқ Марк Овермарсни эслатиб юборади. Лекин «Реал»да тўп сурган Кларенс Зеедорф ҳам ўз вақтида худди Стерлинг каби жўшқин, тезкор эди. Хуллас, англиялик ёш футболчи - АПЛ янги мавсумидаги энг фаол ўйин­чилардан бири. Қолаверса, Гвардиола ҳам Раҳимнинг иқтидорини тўла юзага чиқариш учун астойдил ҳаракат қилаётганини унутмаслик керак.

 

Юлиан Вайгль («Боруссия» Д.)

Ёши: 21да

Юлдуз прототипи: Хаби Алонсо

Иқтидорига фақат ҳавас қилиш мумкин бўлган яна бир ажойиб футболчи. Юлиан ҳали ёш, лекин «Боруссия» (Дортмунд)нинг бугунги  ўйинларини усиз тасаввур қилиб бўлмайди. Шу боис, кўпинча «Бавария» ёки «Реал» мухлислари ҳазиллашиб, шундай иқтидорларни тарбиялаб, севимли клубларига тайёрлаб бераётгани учун «Боруссия»га ташаккур билдиришади. Ҳа, чиндан ҳам тез орада Вайглни Мюнхен ёхуд Мадридга таклиф қилиб қолишлари мумкин. Аммо ҳозирча у Тухелнинг ихтиёрида. Йигитча эса майдонда худди Алонсо, Хави ва Иньесталар каби ҳаракатланишда давом этмоқда. Испания термасининг олтин авлоди вакиллари қандай ўйнашганини эса ортиқча таърифлаш шарт эмас.

 

Деле Алли («Тоттенхэм»)

Ёши: 20да

Юлдуз прототипи: Фрэнк Лэмпард

«Шпорлар»нинг серҳаракат ва чаққон ярим ҳимоячиси ёшлигида Стивен Жеррардга ҳавас қилиб улғайди. Бугун эса Аллини айнан «Ливерпуль» афсонасига қиёслашади. Бизнингча эса, Аллининг ўйинлари кўпроқ Фрэнк Лэмпардни эслатиб юборади. Фарқи шундаки, Лэмпард оғиркарвон футболчилар тоифасидан эди. Деле эса ундан анча енгилроқ ҳаракатланади. Ўрни келганда эслатиб ўтиш лозим, Деленинг болалиги ҳавасга арзимайди. Чунончи, унинг онаси ичкиликка ружу қўяди, келиб чиқиши Нигерия томонларга бориб тақалувчи отаси эса Деле дунёга келгач, оиласини ташлаб кетади. Шу боис, чақалоқни инсонпарварлик ҳаракати аъзолари оталиққа олишади ва кейинчалик мурувватли бир оилага бериб юборилади. Эътиборлиси, айнан шу оила болакайни «Тоттенхэм» футбол мактабига олиб келади. Энди бўлса ана шу болакай Англия терма жамоасида тўп сурмоқда.

 

Марко Асенсио («Реал»)

Ёши: 20да

Юлдуз прототипи: Хосеп Гвардиола

Айтишларича, россиялик таниқли собиқ футболчи Валерий Карпин «Мальорка»да ишлаб юрган кезлари Асенсио исмли болакайнинг тезлигига қойил қолиб, уни клуб раҳбарларига тавсия этган экан... Бу қанчалик ҳақиқатга яқин, билмадигу, аммо Марко ўзининг аниқ тўп оширишлари билан худди Гвардиолага ўхшаб кетади. Зеро, Пеп ҳам ўз вақтида аниқ узатмалар борасида устаси фаранг эди. Афсуски, шундай иқтидор билан ҳам Марко «Реал» асосий таркибидан мунтазам ўрин ололмаяпти. Бунга жамоадаги юлдузларнинг кўплиги ҳам йўл қўймайди, аслида, лекин Асенсио Испания чемпионати, УЕФА суперкубоги ўйинларида ўзини кўрсатишга улгурди.

 

Ҳужумчилар

Келечи Ихеаначо

(«Манчестер Сити»)

Ёши: 19да

Юлдуз прототипи: Патрик Клюйверт

Нигериялик ёш ҳужумчи Гвардиоланинг маслаҳатларига тўла амал қилса, Агуэро билан алоқаларини шундай давом эттирса, келажакда уни юлдузлик шоҳсупаси кутмоқда. Эсингизда борми, бир вақтлари Месси бразилиялик Роналдиньога ҳавас қиларди. Бугун эса Леони кумири деб билмайдиган болаларни топиш амримаҳол. Нигерия футболи тарихида иқтидорли футболчилар доим бўлган. Бироқ Келечи уларнинг ҳаммасидан, ҳатто Веа, Дрогба ёки Это~Одан ҳам узоқроққа бориши мумкин.

 

Маркус Рэшфорд

(«Манчестер Юнайтед»)

Ёши: 18да

Юлдуз прототипи: Николя Анелька

Рио Фердинанд февраль ойида Маркусни Англиянинг энг яхши ҳужумчиси деб атади. Биз эса тажрибали ҳимоячининг сўзларига яна шуни қўшимча қиламизки, Рэшфорднинг профессионал мақомга эга клубдаги илк фаолияти ҳатто Месси, Рауль, Агуэро ва Суаресларникидан ҳам яхшироқ бошланди. Боз устига, уни тарбиялаган жамоанинг ўзи ҳамон барқарор ўйин намойиш қила олмаяпти. Айтганча, энди Маркуснинг Златан Ибрагимович каби малакали устози ҳам бор. Демак, у янада ўсса, ажабмас.

 

Бош мураббий

Эдди Хоу («Борнмут»)

Рўйхатимиздаги вундеркиндларнинг ўртача ёши 19,9да. Демак, бу терма жамоанинг мураббийи ҳам шунга яраша бўлиши лозим. Аслида, «Хоффейнхайм»ни бошқараётган, Месси ва Агуэролар билан тенг­дош бўлган Юлиан Нагельсманн мураббийлик ўрнига жуда мос келади. Бироқ биз бу ўринга «Борнмут»нинг ёш устози Эдди Хоуни танладик. Негаки, у 38 ёшида ҳам худди 28 ёшли футболчига ўхшаб кўринади ва ғоялари ҳам чакки эмасдек. Эътибор беринг, Пеп Гвардиола шу пайтгача ўтган ўйинлардаги энг кучли рақиб сифатида айнан «Борнмут»ни тилга олди ва бу бежиз эмас. Ким билади дейсиз, вақтлар келиб, Хоу «Манчестер Юнайтед» ёхуд «Арсенал» бошқарувини қўлга олар?! Бундай дейишимизга сабаб, юқорида номлари тилга олинган футболчиларнинг аксарияти яқин келажакда кўзга кўринган юлдузларга айланишларига шубҳа йўқ. Шундай экан, Хоуга ҳам ишонч билдириш мумкин. Умуман, рамзий терма жамоамиздаги ҳар бир футболчини эслаб қолишни тавсия қиламиз. Негаки, кечагина мактаб ёки коллежда ўқиб юрган бу болалар ҳозирнинг ўзида катта футболнинг ажралмас қисмига айлана олишди. Эртага эса уларга юлдузларга қарагандек қарай бошлаймиз...

Жаҳонгир МИРЗО тайёрлади