Марио ўзгарди (ми?)
25 сен 2016 09:12
Новости
![](https://championat.asia/upload/storage/222270_original.jpg)
![](/upload/storage/222270_220.jpg)
Марио ўзгарди (ми?)
- Марио Балотелли учун «Ливерпуль» қанча маблағни кўкка совурганлиги ҳақидаги саволга жамоа афсонаси Жейми Каррагер шундай жавоб қайтарганди.
Чиндан ҳам, ўз вақтида ўта ноёб иқтидор соҳиби сифатида эътироф этилган футболчи сўнгги пайтларда кўпчиликка эрмак бўлиб қолди. Ҳозир Марио бутун диққат-эътиборни фақат футболга қаратиш лозимлигини англаб етган кўринади - италиялик «безори»нинг икки аниқ зарбаси эвазига «Марсел»дан устун келган «Ницца» «Монако» билан турнир жадвалини бошқариб бораётганди, аммо кеча бўлиб ўтган 6-тур баҳсида «Ницца» «Монако» дарвозасига 4та тўп йўллади. Бу голларнинг 2таси Балотеллига тегишли. 20 ёшли пайтида 30 млн. еврога баҳоланган ҳужумчидан кейинчалик «Ливерпуль», «Бешиктош», «Бордо», «Сассуоло» ва «Палермо» клублари юз ўгиришди. Ажабтовур қилиқлари билан барчани ҳайрон қолдираётган Балотелли хусусида фикр билдирмаган мутахассис деярли қолмади. Леонардо Бонуччи уни «примадонна»га қиёслаган бўлса, «Сампдория» мураббийи «Марио учун Марионинг ўзи биринчи душман», деганди. Италия терма жамоаси бош мураббийи Жампьеро Вентуранинг фикрича, Балотелли фақат футболчи эканлигини исботламоқчи бўлган лаҳзалардагина ёрқин ўйин кўрсатар экан. Андреа Пирло: «Очиғи, Марио мени ажаблантирмоқда. У дунёнинг энг кучли ҳужумчиларидан бири бўлишини кутгандим. Энди у вақтни бой бериши мумкин эмас!»
Жамоалар эса Балотеллининг агенти таклифларига фақат салбий жавоб қайтаришар, ҳатто «Кьево» ҳам ҳамкорлик қилишни истамаганди. Ниҳоят, «Ницца» уни иш билан таъминлашга рози бўлди. Лекин жамоа бош мураббийи ҳужумчига тўла ишонч билдиролмаслигини қистириб ўтди: «Марио анчадан бери майдонга тушмаяпти». Ҳар қандай мижозини устама баҳоларда пуллаш ҳадисини олган Мино Райола ҳам Марио борасида иложсиз эканлигини тан олди: «Мижозимга кимдир қизиқиш билдириши учун анчагина тер тўкишимга тўғри келмоқда». Хуллас, Балотеллининг футболчилик фаолияти таназзулга юз тутганди. Италиялик футболчининг 6 йил ичидаги можароларини санаб ўтиришдан манфаат йўқ. Янги жамоаси билан шартномага имзо чекар экан, Марио бу билан «Ницца» ҳеч нарса йўқотмаслигини қайта-қайта таъкидлади. 5 дақиқа ичида 3 марта такрорлади! Муваффақиятли тўп суриш учун барча шароитларга эга бўлган футболчи қандай хатоликларга йўл қўйди?
Мино Райола хизматидан фойдаланишни маъқул кўрди
Мино Райола доимо ўз мижозларининг (шунингдек, ўзининг ҳам) манфаатини ҳимоя қиладиган мутахассис сифатида танилган. Бироқ унинг олифталарча тажовузкор услуби ҳаммага ҳам ёқавермайди. Райола ўз мижозлари атрофида кучли шов-шув кўтаради, босимга дош бера олганлар янада юқорироқ даражага кўтариладилар. Дош беролмаганлар эса Балотелли қисматини тотиб кўрадилар. Бир пайтлари Мино Мариони Италиянинг келажаги дея алқаган, «Челси» ва «ПСЖ»дек грандларнинг пули озлик қилишини таъкидлаганди. Яна мижозининг баҳоси 250 млн.дан кам эмаслигини, уни ўз сафига қўшиб олган «Милан»га омад кулиб боққанлигини айтганди. Гарчи Марио «Милан» ва «Манчестер Сити»да рисоладагидек ўйнаган бўлсада, сарфланган маблағни оқлай олмади. Райола башорат қилган 3та «Олтин тўп» ҳамон насиялигича қолмоқда. Агент ташаббуси билан юзага келган шов-шувлар носоғлом муҳитни шакллантирди. Марионинг ажабтовур қилиқлари эса гулханга мой қуйиб турди. Бир пайтлари Хавьер Занетти Мариога маслаҳат беришга журъат этганди. У агентни очиқчасига айблаган бўлмасада, ёш ҳужумчининг фаолияти нотўғри йўлларга кириб қолишидан огоҳлантирганди. Ким билади, дейсиз, Марио сал хушмуомалароқ агент билан ишлаганида воқелар ривожи бошқачароқ бўлармиди? Айтганча, Италиянинг айрим клублари Райола билан умуман ҳамкорлик қилмайдилар.
Голларидан қувонмасди
Рақиб дарвозасини ишғол этганидан сўнг эҳтиросларни намойиш этмаслик одати Марионинг 19 ёшли даврида пайдо бўлганди. Бу ҳолатни ҳужумчи ўта таъсирчан ҳолда изоҳлаганди: «Гол уриш менинг вазифам. Шунчаки, ўз ишимни адо этяпман, бунинг қувонадиган ери йўқ. Ахир, почта ходими кимгадир мактуб олиб борса қувончдан ирғимайдику!». Очиғи, ишонарли эмас. Эндигина юқори савияда тўп сура бошлаган йигитчанинг зарбалари минглаб мухлисларга қувонч улашса-ю, унинг ўзи уларга шерик бўлмаса... Бундай совуққонлик ҳеч кимга ёқмади: ўта камтарлик-такаббурлик!
Шу тариқа мухлислар билан ҳужумчи ўртасидаги муносабатларга дарз кетди. «Барса»га қарши кечган ЧЛнинг ярим финалидаги тарихий ғалабадан сўнг намойиш этган бемаъни қилиғи эса ҳаммасидан ошиб тушди: ўшанда футболчи эгнидаги футболкасини ечиб, майдонга улоқтирганди. Бундан нафақат мухлислар, балки жамоадошлари ҳам қаттиқ ранжишди. Шундан кейин Марио ўзига янги жамоа қидиришга мажбур бўлганди.
Ҳаммага панд берди
Балотелли буюк иқтидор соҳиби эди. 2009|2010 йиллар мавсумида «А» сериянинг 13та учрашувида майдонга тушиб, 9та гол ва 4та самарали узатмани амалга оширганди. Ана шу юксак натижанинг салбий томони ҳам йўқ эмас - 9та гол ёнида 7та сариқ карточка ҳам бор. «Манчестер Сити»да: 6та гол, 6та карточка, «Милан»даги кейинги фаолияти: 28та гол, 21та карточка. Қисқаси, деярли ҳар бир аниқ зарбага шунча қўполлик тўғри келмоқда. Аслида, Марио қўпол ўйинчи эмас. Ҳакамлар билан кўп басҳлашади, рақиблар уюштирган фитналарга албатта, жавоб қайтаради, қоида бузилади. Бунақа жиззакиларга ишонч билдириб бўлмайди. Жозе Моуриньо нидоларига эътибор беринг: «Барча ҳужумчилар жароҳат олишган, Милитога ҳам, Это~Ога ҳам умид йўқ эди. Ягона имконият - Балотеллини майдонга тушириш.43-дақиқада Марио сариқ карточка олди. 15 дақиқалик танаффуснинг 14 дақиқасини унга сарфладим. Рақибларнинг иғволарига учмасликни уқтирдим. У эса 46-дақиқада қизил карточка олди!». Балотелли қанчалик беқарор ўйинчи бўлмасин, Роберто Манчини доимо унга ишонарди. Аммо Марио бу мураббийга ҳам панд берди.
Мураббий билан жанжаллашди
Манчини Мариони асосий таркибга қўшиб майдонга тушира бошлади. Ёш ҳужумчини ёрқин келажак кутаётгани ҳақида кўп гапирарди. Жанжал-тўпалон билан «Интер»ни тарк этган футболчи Манчини туфайли «шаҳарликлар» сафидан жой олганди. Лекин 2013 йилнинг январида бўлиб ўтган машғулотларда устоз-шогирд жанжаллашиб қолишди. Марионинг болаларча инжиқ табиати Манчестердаги фаолиятини барбод этди. Оқибатда, футболчи Миланга қайтишга мажбур бўлди.
Хатоларидан хулоса чиқармади
Шартнома имзолаш пайтида «Ницца»нинг ҳеч нарса йўқотмаслиги ҳақида такрор-такрор айтилган фикрларидан Марио йўл қўйган хатоларидан тегишли хулоса чиқаргандек, ундаги иқтидор билан ҳозирда эга бўлиб турган нуфузи ўртасида улкан тафовут бор эканлигини тушунгандек туюлганди. Бироқ орадан атиги 2 кун ўтгач, «Твиттер»да Жейми Каррагерга қарши жангга киришди.
Бу бир ҳодиса эмас. Аввал ҳам Марио жуда кўп марта тавба қилган, энди ўз маҳоратини кўрсатишга ваъда берганди. Бунга мисол тариқасида унинг «Сити»дан «Милан»га ўтиши ва яна ортга қайтишини кўрсатиш мумкин. Ҳар сафар ҳужумчи ўзи тарк этаётган жамоага «тош» отар, кейин ҳеч нарса бўлмагандек қайтиб келарди. Захира ўриндиғида ўтирган пайтида фақат Месси ундан кучлироқ экани ҳақида сафсата тарқатар, ўзини кўрсатиш учун майдонга туширилган пайтда эса яккама-якка вазиятда тўпни негадир товони билан дарвозага йўллашга уринарди. Қизиқ, бунинг ўрнига оддийгина зарба билан гол уриб қўя қолса бўлмасмикан? Наҳотки, ўзига ҳам панд бермасдан юра олмайдиган ҳолга тушган бўлса?
Ҳозирда «Мен Мариога ишонаман, у албатта юксак маҳоратини намойиш этади!», дейдиган мутахассис умуман қолмади, ҳисоб. Аксинча, ўзини-ўзи хароб қилди қабилидаги якуний хулосага келганлар тобора кўпаймоқда. Ваҳоланки, гап ёши 30дан ошиб, фаолиятини якунлаш арафасида турган фахрий футболчи эмас, эндигина 26га чиққан, етарли куч-қувват, маҳоратга эга ҳужумчи ҳақида кетмоқда. Эҳтимол ҳамманинг ҳафсаласи пир бўлганлиги, бу ёғига мухлису мутахассислар Балотеллидан ҳеч нарса кутмасликлари ҳужумчига бутун диққат-эътиборини фақат футболнинг ўзига қаратиш имкониятини берар? Ортиқча шов-шувлар ва босимдан халос бўлган форвард балки «Ницца»да секин-аста ўз мавқеини тиклаб олар? Эҳтимол, «Марсел»га қарши учрашувда қайд этилган «дубль» ана шу ижобий ўзгаришнинг тарихий нуқтасига айланар? Одатда, тахмин қилинган мўъжизадан кўра, кутилмаганда намойиш этилган ёрқин ўйиннинг шуъласи кўзни кучлироқ қамаштиради...
Соддиқ СОБИР тайёрлади
Похожие новости
![AMP Logo](https://championat.asia/image/logo-amp.png)
Комментарии